रौतहट : बाढी तथा अविरल वर्षाका कारण रौतहटमा दुई अर्ब दश करोड रुपैयाँ बराबरको बालीनालीमा क्षति पुगेको छ । कृषि ज्ञान केन्द्र रौतहटले सार्वजनिक गरेको तथ्यांक अनुसार १७ पालिकाका १२ हजार दुई सय ८० किसानको उक्त रकम बराबरको क्षति भएको हो ।
सो तथ्यांकमा ११ हजार दुई सय ५८ हेक्टर जग्गामा लगाइएको धानबाली, नौ सय ९६ हेक्टर जग्गामा लगाइएको उखु बाली, चार सय ४७ हेक्टर जग्गामा लगाइएको तरकारी, दुई सय २३ हेक्टरमा लगाएको फलफुल बाली र पचास हेक्टर जग्गामा लगाइएको मकै तथा चालिस हेक्टरमा लगाइएको दालबाली बाढी र अविरल वर्षका कारणबाट क्षति भएको कार्यालय प्रमुख सुरेन्द्र कुर्मीले जानकारी दिए ।
किसानले केही दिनमै भित्र्याउने तयारीमा जुटेको धानबाली अविरल वर्षा र बाढीले नष्ट गरिदिएको छ । वर्ष दिन सोही बालीबाट आहार र व्यवहार गर्नुपर्ने आश्रित परिवारलाई ठूलो मारमा परेको गौर नगरपालिका वडा नम्बर ४ का किसान राम नरेश यादवले बताए । सो किसानहरुले अब केही दिनमा शुरु हुने गहुँ खेती तथा मसुरो खेतीबालिमा सरकारले सहयोग गरी दिनुपर्ने किसान यादवको माग रहेका छन् ।
