दोहा : कतार सरकारले हर्मुज जलडमरूतर्फ आइरहेको कतारी जहाज ‘अल रेकय्यात’ माथि भएको आक्रमणको कडा शब्दमा निन्दा गर्दै उक्त घटनाका लागि इरानलाई कानुनी रूपमा पूर्ण जिम्मेवार ठहर गरेको छ । कतारका प्रधानमन्त्रीका सल्लाहकार तथा सरकारका प्रवक्ता डा. माजिद बिन मोहम्मद अल अन्सारीले सामाजिक सञ्जाल एक्स मार्फत प्रतिक्रिया जनाउँदै उक्त आक्रमण अन्तर्राष्ट्रिय समुद्री सुरक्षामाथिको अस्वीकार्य हमला भएको बताएका छन् ।

उनले जहाजमाथिको आक्रमणले अन्तर्राष्ट्रिय समुद्री यातायातको सुरक्षा, विश्वव्यापी ऊर्जा आपूर्ति तथा समुद्री मार्गको स्वतन्त्र आवागमनमा गम्भीर खतरा उत्पन्न गरेको उल्लेख गरे। यो घटना अन्तर्राष्ट्रिय कानुन, विशेष गरी अन्तर्राष्ट्रिय जलमार्गमा स्वतन्त्र र सुरक्षित आवागमन गर्ने स्पष्ट व्यवस्थाको गम्भीर उल्लंघन भएको उनको भनाइ छ ।

डा. अन्सारीले इस्लामिक गणतन्त्र इरानलाई क्षेत्रीय सुरक्षामा असर पार्ने तथा अन्तर्राष्ट्रिय समुद्री यातायातको सुरक्षालाई जोखिममा पार्ने सबै गतिविधि तत्काल बन्द गर्न आग्रह गरेका छन् । उनले विश्व ऊर्जा आपूर्ति र क्षेत्रीय राष्ट्रहरूको स्रोतसाधनलाई स्वार्थका लागि जोखिममा नपार्न पनि इरानलाई चेतावनी दिएका छन् ।

उनले कतार सरकारले ‘अल रेकय्यात’ जहाजमाथि भएको आक्रमण तथा त्यसबाट उत्पन्न भएका सबै क्षति, नोक्सानी र परिणामका लागि इरानलाई कानुनी रूपमा पूर्ण जिम्मेवार ठहर गरेको स्पष्ट पारेका छन् ।