काठमाडौँ : सर्वोच्च अदालतले एमाले उपाध्यक्ष तथा पूर्वउपप्रधानमन्त्री विष्णु पौडेलसँग सम्बन्धित बन्दी प्रत्यक्षीकरण रिटको सुनुवाइका क्रममा विशेष अदालतमा विचाराधीन सम्पत्ति शुद्धीकरण मुद्दाको सक्कल मिसिल मगाउने आदेश दिएको छ।

न्यायाधीश टेकप्रसाद ढुंगाना र मेघराज पोखरेलको संयुक्त इजलासले रिट निवेदनसँग सम्बन्धित तथ्य तथा प्रमाणको समग्र अध्ययनका लागि विशेष अदालतमा रहेको सुलभ अग्रवाल र दीपक भट्ट प्रतिवादी रहेको सम्पत्ति शुद्धीकरण मुद्दाको मूल मिसिल सर्वोच्चमा पेश गर्न आदेश जारी गरेको हो।

उक्त बन्दी प्रत्यक्षीकरण रिट विष्णु पौडेलकी पत्नी दोमाया पौडेलले दर्ता गराएकी हुन्।

अदालतको आदेशअनुसार विशेष अदालतमा रहेको सम्बन्धित मुद्दाको सम्पूर्ण मिसिल सर्वोच्च अदालतमा पेश भएपछि त्यससँग सम्बन्धित कागजात, प्रमाण तथा अन्य विवरणको अध्ययन गरी रिटमाथिको सुनुवाइलाई अगाडि बढाइनेछ।

सर्वोच्च अदालतले बन्दी प्रत्यक्षीकरण रिटमा उठाइएका विषयवस्तु र विशेष अदालतमा विचाराधीन सम्पत्ति शुद्धीकरण मुद्दाबीच सम्बन्ध देखिएको निष्कर्षसहित न्यायिक निरूपणका लागि मूल मिसिल आवश्यक ठानेर उक्त आदेश गरेको जनाएको छ।

सुलभ अग्रवाल र दीपक भट्ट प्रतिवादी रहेको सम्पत्ति शुद्धीकरणसम्बन्धी मुद्दा हाल विशेष अदालतमा विचाराधीन छ। सर्वोच्चले माग गरेको मिसिल प्राप्त भएपछि बन्दी प्रत्यक्षीकरण रिटमाथिको थप सुनुवाइ र निर्णय प्रक्रियाले निरन्तरता पाउने अपेक्षा गरिएको छ।