डोल्पा : डोल्पामा माटोको ढिस्कोमा परी तीन महिला घाइते भएका छन् । शुक्रबार बिहान त्रिपुरासुन्दरी नगरपालिका-९ चुँ गाउँमा दसैंका लागि घर पोत्ने माटो खन्ने क्रममा माटोको ढिस्को खस्दा सोही गाउँका तीन महिला घाइते भएका हुन् ।
माटोको ढिस्कोमा परी त्रिपुरासुन्दरी-९ चुँ गाउँकी अन्दाजी ७० वर्षीया बिनरुपा बोहोरा, २९ वर्षीया मनपुरा बि.क र २९ वर्षीया अरुना थकाली घाइते भएको जिल्ला प्रहरी कार्यालय डोल्पाले जानकारी दिएको छ ।
घाइते तीनै जनालाई बिहान ११ बजे जिल्ला अस्पताल दुनैमा उपचारका लागि ल्याइएको थियो । घाइते तीन जनामध्ये बोहोराको मुखमा र बाँया आँखामा चोट लागेको छ भने बि.कको शरीरको तल्लो भागमा भित्री चोट लागेका कारण हिँडडुल गर्न नसक्ने अवस्थामा रहेको अस्पतालले बताएको छ । उनीहरू दुबै जनालाई कर्णाली प्रदेश अस्पताल रिफर गरिएको छ भने थकालीको अवस्था सामान्य रहेको अस्पतालले जानकारी दिएको छ ।
नेपालीहरूको महान चाड बडादसैं नजिकिएसँगै अहिले डोल्पाका स्थानीय सदाझैं घर लिपपोतमा व्यस्त देखिएका छन् । घर लिपपोतका लागि माटो खन्दा विशेष सावधानी अपनाएर खन्न जिल्ला प्रशासन कार्यालय डोल्पाले अनुरोधसमेत गरेको छ ।
