काठमाडौं : साउदी अरबस्थित नेपाली राजदूतावासले कतिपय फाइल सदर गरेबापत रोजगारदाता कम्पनीहरुबाट रकम लिने गरेको आरोप लगाइ आएको समाचारप्रति गम्भीर ध्यानाकर्षण भएको भन्दै सो समाचारको खण्डन गरेको छ ।
उक्त दूतावासले विज्ञप्ति प्रकाशन गरी सो समाचारको खण्डन गरेको हो । समाचारमा यस विषयमा उजुरी परेको भनिएकामा यसप्रकारको उजुरी मन्त्रालय तथा सो नियोगमा समेत प्राप्त नभएको पनि स्पष्ट गरेको छ ।
नेपाली राजदूत नवराज सुवेदी, उपनियोग प्रमुख डा डमरुबल्लभ पौडेल र द्वितीय सचिव टीकाराम उपाध्यायको नाम राखेर आएको सो समाचार सत्य नभएको सो विज्ञप्तिमा उल्लेख गरिएको छ । साथै उक्त विज्ञप्तिमा नियोगमा यस प्रकारको कुनै उजुरी प्राप्त भएमा नियमानुसार कारबाही गरी आवश्यक जवाफ पठाइने पनि जनाइएको छ ।
विज्ञप्तिमा विद्यमान अनलाइन मागपत्र प्रमाणीकरण प्रक्रियाअनुसार ‘अपरेटर’, ‘डकुमेन्ट भेरिफिकेशन अफिसर’ र श्रम ‘काउन्सेलर’ले आ–आफूलाई तोकिएका विषयहरुको जाँच गरिसकेपछि राजदूत/उपनियोग प्रमुखबाट स्वीकृत हुने गरेको र राजदूतावासले प्रमाणीकरणका सन्दर्भमा नेपाल सरकारले तोकेको राजस्वबाहेक कुनै पनि रकम नलिने गरेको सो विज्ञप्तिमा जनाइएको छ ।
राजदूतावासले सीमित स्रोत र साधनका बाबजुद पनि सेवा दिइरहेको उल्लेख गर्दै सो विज्ञिप्तमा भनिएको छ, “साउदी अरबमा रहेका नेपाली समुदायको सहयोग र समन्वयमा यस राजदूतावासले सीमित स्रोतसाधन तथा साउदी अरबको विशाल भूगोल, विषम हावापानी र भिन्न परिवेशका बाबजुद पनि नेपाली श्रमिक दाजुभाइ तथा दिदीबहिनीलाई सहजरुपमा राहदानी, कन्सुलर, उद्धार, आश्रयस्थल, बहिर्गमन भिसा, शव फिर्ता, बीमा तथा क्षतिपूर्ति दाबी र घर फिर्तीलगायतका सेवा दिइरहेको सबैमा सर्वविदितै छ ।”
साथै दूताबासले मागपत्र प्रमाणीकरण, उद्धार, घर फिर्तीलगायतका कुनै पनि समस्या परेमा तत्काल समाधान गर्न नेपाली राजदूतावास रियादले इजाजत पत्रवालाहरुको छाता संगठन नेपाल वैदेशिक रोजगार व्यवसायी संघ र यसका पदाधिकारी तथा वैदेशिक रोजगार विभागलगायतका सरोकारवाला निकायहरुसँग समयसमयमा अनलाइन अन्तरक्रिया गरी समाधान गर्ने गरेको पनि जनाएको छ । रासस
काठमाडौं : युक्रेनसँगको युद्धमा रहेको रूसमा वैदेशिक रोजगारीका लागि श्रम स्वीकृति खोलिएको विषयमा संसदमा प्रश्न उठेको छ । आइतबार प्रतिनिधि सभाको विशेष समयमा बोल्दै नेपाली कांग्रेसकी सांसद रमा कोइराला पौड्यालले युद्धग्रस्त क्षेत्र र देशमा श्रमिक पठाउने कामले नेपालीलाई जबरजस्ती युद्धमा धकेलेको भन्दै श्रम स्वीकृति तत्काल बन्द गर्न माग गरिन् ।
सांसद पौड्यालले प्रश्न गर्दै भनिन्, ‘रूस र युक्रेनको युद्धका कारण हाम्रा युवाहरुले मृत्युवरण गरिरहेको कुरा छिपको छैन । रूसी तथा युक्रेनी सेनामा रहेका युवाहरु फर्काइदेउ भनेर रोदन गरिरहेका छन् । यही बेला श्रम मन्त्रालयबाट रोजगारीका लागि जान छुट दिएको कुरा आएको छ, सरकारले के गर्न खोजेको हो ? देशमा बेरोजगार युवाहरू धेरै भए भनेर मृत्युको बाटो खुलाएको हो ?’
युद्धग्रस्त क्षेत्र र देशमा श्रमिक पठाउने काम सरकारले तत्काल बन्द गर्नुपर्ने माग गर्दै उनले भनिन्, ‘देशमा रोजगारी दिन सकिँदैन युवा मरेर जाउ, विदेशीका लागि लडेर मरे मर भन्ने ? युद्धग्रस्त क्षेत्र र देशमा श्रमिक पठाउने काम बन्द गर्नुपर्छ । युवाहरूलाई जाउ मरे मर भन्न पाइँदैन ।’
वैदेशिक रोजगार विभागले रूस युक्रेन युद्ध शुरू भएपछि गत पुस १९ गतेदेखि रूस र युक्रेन दुवै देशका लागि सबै प्रकारका श्रम स्वीकृति रोकेको थियो । तर फागुन ९ गतेको सचिवस्तरीय बैठकले पुनः श्रम स्वीकृति र म्यानपावर कम्पनीमार्फत रसियाको सिनोपिक इन्जिनियरिङ रसिया ग्रुप एलएलसी कम्पनीका लागि छनोट भएकालाई फागुन १६ गतेदेखि अन्तिम श्रम स्वीकृति दिने निर्णय गरेको सार्वजनिक भएको थियो ।
वैदेशिक रोजगार विभागले रूसका लागि श्रम स्वीकृति खुला गरेकै दिन श्रम, रोजगार तथा सामाजिक सुरक्षामन्त्री डोलप्रसाद अर्यालले राष्ट्रिय स्वतन्त्र पार्टी (रास्वपा)ले आयोजना गरेको एक कार्यक्रममा नेपालीलाई रुस जान व्यक्तिगत श्रम स्वीकृतको व्यवस्था बन्द नै रहेको बताएका थिए ।
काठमाडौं : वैदेशिक रोजगारका लागि क्यानडा पठाइदिने भन्दै झण्डै आधा करोड ठग्ने एक ब्यक्ति पक्राउ परेका छन् । प्रहरीले बिभिन्न ब्यक्तिलाई आकर्षक तलवमा क्यानडा पठाउने भनी ४० लाख रुपैयाँ ठगी गरेको आरोपमा प्रहरीले एक जनालाई पक्राउ गरी सार्वजनिक गरेको हो ।
पक्राउ पर्नेमा काठमाडौं गोकर्णेश्वर नगरपालिका–७ बेसीगाउँ बस्ने ४१ वर्षीय सुदेश सुनुवार मुखिया रहेको काठमाडौं उपत्यका अपराध अनुसन्धान कार्यालयका सूचना अधिकारी एवम् प्रहरी उपरीक्षक नकुल पोखरेलले जानकारी दिए ।
उनले भने, ‘बेरोजगार युवायुवतिलाई वैदेशिक रोजगारीमा पठाउने भनि आकर्षक तलबको प्रलोभनमा पारी पीडितबाट ४० लाख रकम लिइ विदेश नपठाइ सम्पर्कविहीन भएकोमा पीडितमध्येका एक जना लेखनाथ भुर्तेलले जाहेरी दिइ अनुसन्धान हुँदा विदेश पठाउने भनि ठगी गर्ने निज सुदेश सुनुवार मुखियालाई काठमाडौंको बौद्धबाट पक्राउ गरी सार्वजनिक गरिएको हो ।’
मुखियालाई थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको सूचना अधिकारी पोखरेलले जानकारी दिए ।
काठमाडौं : वैदेशिक रोजगारमा गएका कामदारबाट जीवन बीमा कम्पनीहरुले चालु आर्थिक वर्षको ८ महिनामा करिब २ अर्ब रुपैयाँ बराबरको व्यापार गरेका छन् । नेपाल बीमा प्राधिकरणले सार्वजनिक गरेको फागुनसम्मको विवरणअनुसार १० वटा जीवन बीमा कम्पनीले वैदेशिक रोजगार बीमालेखबाट १ अर्ब ९९ करोड ९६ लाख रुपैयाँ बीमा शुल्क असुली गरेका छन् ।
वैदेशिक रोजगार बीमालेखबाट सबैभन्दा बढी सन नेपाल लाइफ इन्स्योरेन्स कम्पनीले व्यापार गरेको छ । उक्त कम्पनीले वैदेशिक रोजगार बीमालेखबाट पछिल्लो ८ महिनाको अवधिमा ४९ करोड ८१ लाख रुपैयाँ बीमा शुल्क असुली गरेको छ ।
धेरै असुली गर्ने कम्पनीको दोस्रो नम्बरमा नेपाल लाइफ इन्स्योरेन्स कम्पनी रहेको छ । नेपाल लाइफले ४३ करोड ५३ लाख रुपैयाँ असुली गरेको छ । तेस्रोमा रहेको आइएमई लाइफले २२ करोड ६४ लाख रुपैयाँ असुली गरेको छ । चौथोमा रहेकोे एसियन लाइफले १८ करोड ८५ लाख रुपैयाँ, पाँचौंमा रहेकोे नेशनल लाइफले १७ करोड ५१ लाख रुपैयाँ, छैटौंमा रहेकोे सूर्यज्योति लाइफले १४ करोड २४ लाख रुपैयाँ, सातौंमा रहेकोे सानिमा रिलायन्स लाइफले १३ करोड ८८ लाख रुपैयाँ र आठौंमा रहेकोे रिलायबल नेपाल लाइफले ११ करोड ८४ लाख रुपैयाँ कूल बीमा शुल्क आर्जन गरेका छन् ।
नवौं स्थानको सिटिजन लाइफले ७ करोड ४४ लाख रुपैयाँ र अन्तिममा रहेकोे प्रभु महालक्ष्मी लाइफले १६ लाख ६३ हजार रुपैयाँ कूल बीमा शुल्क असुली गरेका छन् ।
देश र उमेरअनुसार म्यादी बीमाको रकम फरक–फरक तिर्नुपर्ने व्यवस्था छ । वैदेशिक रोजगारीमा साउदी अरेबिया, कतार र यूएईसहित खाडीका देश र मलेसिया जाने कामदारहरूले म्यादी बीमावापत १ हजार ५ सयदेखि ४ हजारसम्मको म्यादी बीमा गर्नुपर्ने व्यवस्था छ । यस्तै कोरिया र इजरायल जाने कामदारले २ हजार ५ सयको बीमा गर्नुपर्ने व्यवस्था छ ।
बीमा कम्पनीहरूले वैदेशिक रोजगारीमा जाने कामदारको श्रम स्वीकृति २ वर्षको जारी भएपनि खाडी मुलुक र मलेसिया जाने कामदारको श्रम स्वीकृतिभन्दा १ वर्ष बढी अवधिको म्यादी बीमा गराउँदै आएका छन् ।
काठमाडौं : श्रम, रोजगार तथा सामाजिक सुरक्षा मन्त्रालयले अस्पतालमा श्रमिक समर्पित बेडको व्यवस्थापन गर्न स्वास्थ्य तथा जनसंख्या मन्त्रालयलाई आग्रह गरेको छ । श्रम मन्त्रालयले वैदेशिक रोजगारी तथा आन्तरिक श्रम बजारमा रहेका श्रमिकलाई लक्षित गरी अस्पतालहरुमा निश्चित बेड तोक्ने व्यवस्था गरिदिन स्वास्थ्य मन्त्रालयलाई आग्रह गरेको श्रममन्त्री डोल प्रसाद अर्यालको निजी सचिवालयले जनाएको छ ।
श्रममन्त्री आर्यलले स्वास्थ्यसम्बन्धी चेतनाको अभाव र दुर्घटनालगायतका कारणले श्रमिकहरु गम्भीर प्रकृतिका स्वास्थ्य समस्यामा रहेकाले उनीहरूको शीघ्र स्वास्थ्य उपचारका लागि श्रमिक समर्पित बेडको व्यवस्था गर्न स्वास्थ्य मन्त्रालयलाई आग्रह गर्नुपरेको बताए ।
श्रम मन्त्रालयले विशेषगरी औद्योगिक करिडोर, औद्योगिक क्षेत्र, विशेष आर्थिक क्षेत्र र औद्योगिक ग्राम भएका क्षेत्रहरुमा स्वास्थय मन्त्रालयअन्तर्गत रहेका सरकारी अस्पताल, स्वास्थ विज्ञान प्रतिष्ठान र प्रदेश अस्पतालहरुमा श्रमिक समर्पित बेडको व्यवस्था गर्न आग्रह गरिएको बताएको छ । अस्पतालको बेड क्षमताका आधारमा निश्चित संख्यामा बेडहरु छुट्याइदिन पनि मन्त्रालयले आग्रह गरेको छ ।
त्यस्तै, मन्त्रालयअन्तर्गतका प्रतिष्ठान र अस्पतालहरुमा श्रमिक हेल्प डेस्क राख्नसमेत आग्रह गरिएको छ । श्रमिकहरुलाई प्राथमिकता दिइ स्वास्थ्य सुविधा उपलब्ध गराउन तथा विदेशबाट रोग लागेर उपचार गर्न फर्किएका श्रमिकहरुलाई उपचारलगायतका विषयहरुमा सूचना एवम् परामर्श दिनका लागि हेल्प डेस्क राख्न आग्रह गरिएको मन्त्रालयले जनाएको छ ।
अपस्तालमा उपयुक्त जनशक्तिसहितको एक स्वास्थ्य परामर्श इकाइ स्थापना गर्नसमेत आग्रह गरिएको मन्त्रालयको भनाइ छ । वार्षिक सात लाखभन्दा बढी संख्यामा नेपाली श्रमिकहरु वैदेशिक रोजगारीमा जाने गरेका छन् भने नेपालमा औपचारिक तथा अनौपचारिक क्षेत्रमा गरी करिब ७० लाख श्रमिकहरु कार्यरत रहेका छन् ।
काठमाडौं : वैदेशिक रोजगार कार्यालय ताहचलले दैनिक ३ सिफ्टमा सेवा दिन थालेको बताएको छ । श्रम, रोजगार तथा सामाजिक सुरक्षामन्त्री डोलप्रसाद अर्यालले एक घण्टाभित्रै श्रम स्वीकृति दिने गरी कार्यालयमा कर्मचारी तथा प्राविधिक पक्ष मजबुत बनाउन निर्देशन दिएपछि कार्यालयले दैनिक ३ सिफ्टमा काम गर्ने बताएको हो ।
वैदेशिक रोजगार विभागले हरेक दिन बिहान ७ बजेदेखि दिउँसो २ बजेसम्म, दिउँसो २ बजेदेखि राति ९ बजेसम्म र राति ९ बजेदेखि बिहान ४ बजेसम्मको ३ सिफ्ट कायम गरेर श्रम स्वीकृति दिन थालेको छ । बिभागका महानिर्देशक डण्डुराज घिमिरेले शनिबार र सार्वजनिक बिदाका दिनमा समेत सेवा दिन शुरु गरिएको बताए । कम्प्युटरहरुमा र्याम र एसएसडीको क्षमता बढाएर सहजरूपमा बिहान १० बजेदेखि दिने टोकन प्रणाली दिउँसो १ बजेपछि मात्रै खुला गर्न थालेको विभागले बताएको छ ।
वैदेशिक रोजगार कार्यालयमा हाल दैनिक एक हजार ५ सयदेखि २ हजार श्रमिकले पुनः श्रम स्वीकृति र १ हजार जनाले नयाँ श्रम स्वीकृति माग गर्ने गरेको कार्यालयले बताएको छ ।
दोस्रो पटक श्रम मन्त्रालयको जिम्मेवारी सम्हालेपछि गत चैत ४ गते श्रममन्त्री अर्यालले पुनः श्रम स्वीकृति लिएर वैदेशिक रोजगारीमा जाने कामदारलाई एक घण्टाभित्र श्रम स्वीकृति दिने गरी वैदेशिक रोजगार सूचना व्यवस्थापन प्रणाली (फेमिस)को सुधार गर्न निर्देशन दिएका थिए । मन्त्री अर्यालले एक घण्टाभित्र श्रम स्वीकृति दिन सक्ने गरी प्रणाली सुधार गर्नुपर्ने निर्देशन दिएपनि कर्मचारीले ८ वर्षअघिको प्रणालीबाट एक घण्टाभित्र श्रम स्वीकृति दिन सम्भव नदेखिएको बताएका छन् ।
फेमिसमा हाल विभागसहित २० वटा कार्यालय जोडिएका छन् । त्यसले प्रणालीमा सेवाग्राहीको चाप बढाएको छ । तर प्रणाली अपडेट नभइ बारम्बार समस्या आउँदा पुनः श्रम स्वीकृतिभन्दा संस्थागत अर्थात म्यानपावर कम्पनीले पेश गर्ने फाइलमा बढी समस्या देखिएको वैदेशिक रोजगार व्यवसायीको गुनासो छ । यसअघिका महानिर्देशक मदन दहालमाथि सुधारको चर्का वकालत गर्ने, तर प्रणाली सुधारका लागि कुनै ध्यान नदिने गरेको आरोप लागेको थियो ।
काठमाडौं : बंगलादेशका नागरिकलाई युरोप पठाउने भन्दै नेपाल ल्याई बन्धक बनाइराख्ने काममा संलग्न थप एकजना बंगलादेशी नागरिकलाई नेपाल प्रहरीले पक्राउ गरी आज सार्वजनिक गरेको छ ।
पक्राउ पर्नेमा यासिर अहमद भनिने एमडी यासिर बंगला रहेका काठमाडौं उपत्यका अपराध अनुसन्धान कार्यालयका सूचना अधिकारी एवम् प्रहरी उपरीक्षक नकुल पोखरेलले जानकारी दिए । उनका अनुसार निजलाई काठमाडौं महानगरपालिका–९ सिनामंगलबाट हिजो बिहीबार पक्राउ गरी आज सार्वजनिक गरिएको हो ।
पक्राउ परेका निज बंगलाले बंगलादेशी नागरिकहरूलाई युरोपका विभिन्न देशमा वैदेशिक रोजगारीमा पठाउने विश्वास दिलाई बंगलादेशबाट नेपाल ल्याई काठमाडौं महानगरपालिका–१६ पकनाजोलस्थित निभाना ग्रिन पिस होम नामक होटलको कोठामा राखी पीडितहरूको पासपोर्ट नियन्त्रणमा लिएर बन्धक बनाइराखेको पोखरेलले बताए ।
उनले भने, “पक्राउ परेका बंगलालाई अपहरण तथा शरीर बन्धक कसुरमा आवश्यक अनुसन्धान तथा कारबाहीका लागि जिल्ला प्रहरी परिसर टेकु पठाइएको छ ।”
तेज बन/मध्यान्ह
इटहरी : सम्बन्धित सरोकारवालाहरुले नियमित अनुगमन र चासो नराख्दा इटहरीमा अवैध म्यानपावरहरु खुल्ने र उनीहरुको बोलवाला चल्ने क्रम बढ्दो छ । वैदेशिक रोजगार संघ सुनसरीका अनुसार आर्थिक वर्ष २०७७/०७८ मा इटहरीमा ७३ वटा म्यानपावरका शाखाहरु सञ्चालनमा रहेकोमा हाल उक्त संख्या २ सय १५ भन्दा बढी पुगेको छ ।
सञ्चालनमा रहेका अधिकांश शाखाहरु वैदेशिक रोजगार ऐन र नियमावलीको व्यवस्थाअनुसार चलेका छैनन् । इटहरीको धरान रोडमा मात्रै म्यानपावर कम्पनीका ४२ वटा शाखा सञ्चालनमा छन् । गत वैशाख दोस्रो साता वैदेशिक रोजगार विभाग, श्रम कार्यालय विराटनगर, जिल्ला प्रसाशन कार्यालय सुनसरीलगायतले संयुक्त अनुगमन गर्दा इटहरीमा अधिकांश म्यानपावर अवैध ठहरिएका थिए । ९ वटा म्यानपावरमा अनुगमन गर्दा ५ वटा अवैध भेटिएको थियो भने ३ वटामा शिल नै गरिएको थियो ।
वैदेशिक रोजगार विभागका तत्कालीन निर्देशक कृष्णप्रसाद भुसालको नेतृत्वमा इटहरीको धरान रोड, विराटनगर लाइन, टेंग्रा पारी, गोरखा गल्लीलगायतका स्थानमा सञ्चालित म्यानपावरका शाखाहरुमा अनुगमन गरिएको थियो । अनुगमनकै क्रममा महेश थापाद्वारा सञ्चालित एड्भान्स म्यानपावर, विदुर गुरुङको वल्र्ड एण्ड वल्र्ड म्यानपावर, टिकाराम घिमिरेले सञ्चालन गरेको डिलक्स परी म्यानपावर, मोभिरा एचआर ओभरसिज र ब्रिज स्काइ इन्टरनेशनलमा ताला लगाइएको थियो । जसमा मोभिरा एचआर र ब्रिज स्काइ इन्टरनेश्नलमा शिल नै गरिएको थियो ।
त्यस्तै २०७८ असारमा अनुगमन हुँदा पनि मोभिरामा ताला लगाएर विभाग बोलाइएको थियो । एक वर्षअघि शिल भएका ती म्यानपावर कम्पनीका शाखाहरु अहिले पनि निर्वाधरुपमा सञ्चालन भइरहेका छन् । अनुगमन आउँदा साइनबोर्ड हटाउने र कार्यालयमा ताला लगाउने, तर विभागको टोली गएलगत्तै पहिलेजस्तै अवैधानिक शाखाहरु वैधानिक सरह सञ्चालन गर्ने गरिएको एक म्यानपावर कम्पनीका शाखा सञ्चालक बताउँछन् ।
वैदेशिक रोजगार संघ सुनसरीका अध्यक्ष दुर्गा थापाले इटहरीमा अवैध म्यानपावरका कारण आफूहरुजस्ता वैधानिकलाई काम गर्न अप्ठ्यारो भइरहेको बताए । संघका अध्यक्ष भक्त लामा इटहरी वडा नं ४ को वडाध्यक्षमा निर्वाचित भएपछि थापालाई संघको जिम्मेवार दिइएको थियो । थापाले पटक–पटक अनुगमन गर्दा पनि नसुध्रिने अवैधानिकरुपमा व्यवसाय गर्नेहरुलाई कानूनसम्मत सजाय दिनुपर्ने माग गरे । उनले अवैधानिकरुपमा सञ्चालनमा रहेकाहरुका कारण वैधानिक शाखाहरु बदनाम हुने गरेको बताउँदै त्यस्ता गैरकानूनी व्यवसाय गर्नेहरुलाई राज्यले कानूनको दायरामा ल्याउनुपर्ने बताए ।
यता वैदेशिक रोजगार विभागका अनुगमन अधिकृत चक्रबहादुर श्रेष्ठले इटहरी मात्र नभइ कोशी प्रदेशमै अवैधानिक शाखा सञ्चालनको गुनासो आइरहेको बताए । उनले नियमितरुपमा अनुगमन गर्ने बताउँदै कोशी प्रदेशमा मात्र गत आर्थिक वर्षमा २ सय ६३ भन्दा बढी अवैधानिकरुपमा रहेका म्यानपावर कम्पनीका शाखाहरुलाई कारबाही गरिएको जानकारी दिए । अधिकृत श्रेष्ठले इटहरीको हकमा शिल गरिसकेको म्यानपावरका शाखा सञ्चालन भएको पाइए कानूनबामजोमि कारबाही गरिने बताए ।
ठगिँदै सर्वसाधारण
इटहरीमा बाहिर एउटा बोर्ड राखेर भित्र अर्कै नाममा सञ्चालन हुने म्यानपावरका शाखाहरु पनि थुप्रै रहेको देखिएको छ । यस्ता म्यानपावरहरुका कारण युवायुवती ठगिने क्रम बढेको श्रम कार्यालय इटहरीले बताएको छ ।
अघिल्लो वर्ष २६ हजार युवायुवतीहरु ठगिएको उक्त कार्यालयको भनाइ छ । इटहरी चारैतिरको संगम स्थल भएकै कारण विशेषगरी पहाडी जिल्लाबाट आएका युवा युवतीहरु बढी ठगिने गरेको उक्त कार्यालयले बताएको छ । अनुगमनकै क्रममा अधिकांश शाखाहरुले हुँदै नभएको अरु विदेशी कम्पनीको डिमाण्ड देखाएर सूचना निकाल्दै सर्वसाधारणलाई ठग्ने गरेको भेटिएको बताइएको छ ।
वैदेशिक रोजगार संघ सुनसरीका पूर्वअध्यक्ष तथा इटहरी ४ का वडाध्यक्ष भक्त लामाका अनुसार राज्यबाटै वैदेशिक रोजगार व्यवसायहरुका लागि ठोस कानून नहुँदा ठगीको समस्या देखिएको बताए । उनले अवैध शाखाहरुलाई उचित कारबाही नभएका कारण ठगी बढेको बताए ।
इटहरीमा सञ्चालित म्यानपावर शाखाहरुबाट फ्रि भिसा र टिकटको सहुलियत नपाएको कतिपयको गुनासो छ । सरकारले खाडी मुलुकहरु साउदी, कतार, मलेसियालगायतमा फ्रि भिसा, फ्रि टिकटको घोषणा गरेपनि सो निर्णय कार्यान्वयन नगर्दा चर्को मूल्य तिर्नु परिरहेको सर्वसाधारणले गुनासो गरेका छन् ।
काठमाडौं : इजरायलमा रहेका नेपालीहरुले निजी क्षेत्रका म्यानपावर कम्पनीबाट कृषि कामदारमा जाने व्यवस्था रोक्ने नवनियुक्त श्रम, रोजगार तथा सामाजिक सुरक्षा मन्त्री डोल प्रसाद अर्यालको निर्णय व्यवहारिक र बुद्धिमतापूर्ण नरहेको बताएका छन् । मन्त्री अर्यालका नाममा एकपत्र पठाउँदै हाल इजरायलमा कार्यरत नेपालीहरुले आकर्षक कमाइ हुने इजरायलको रोजगारीलाई रोक्दा त्यसले भारतीय अवैध बाटोबाट जाने क्रमलाई सहयोग पु¥याउने खतराप्रति मन्त्री अर्यालको ध्यानाकर्षणसमेत गराएका छन् ।
निवर्तमान श्रममन्त्री शरतसिंह भण्डारीले इजरायलको कृषि क्षेत्रमा म्यानपावर कम्पनीमार्फत कामदार पठाउन दिइसकेको अनुमतिलाई वर्तमान मन्त्रीले ‘होल्ड’ गरेपछि रोजगारीका लागि इजरायल आउन चाहना भएका धेरै नेपालीहरु अहिले निराश भएको उनीहरुको भनाइ छ ।
म्यानपावर कम्पनीबाट जाने प्रक्रिया रोक्दा तत्कालका लागि कम ज्ञान भएका कामदारलाई अनेकौं प्रलोभनमा पार्ने दलालबाट बचाउन सकिने भएपनि नेपाली म्यानपावर कम्पनीबाट पठाउने प्रक्रिया रोकिए नेपाली कामदारहरु भारतीय पासपोर्ट बनाएर पचास लाखसम्म खर्च गरी भारतको अवैधानिक बाटो हुँदै इजरायल पुग्ने उनीहरुको भनाइ छ । हालपनि ३२ देखि ५२ लाख रुपैयाँ तिरेर भारतीय भूमि हुँदै हजारौंको संख्यामा नेपालीहरु इजरायल पुगेको उनीहरुले बताएका छन् ।
नेपाल सरकारको सरकारीस्तरबाट इजरायलमा कामदार पठाउने विषय कागजमा मात्रै सीमित हुने उनीहरुको दाबी छ । सरकारले मात्रै पठाउने भन्ने वर्तमान मन्त्री अर्यालको दृष्टिकोणप्रति असहमति जनाउँदै उनीहरुले भनेका छन्, ‘राजनीतिक अस्थिरताका कारणले ६÷६ महिनामा मन्त्रिपरिषद् र मन्त्री फेरिने, नयाँ आउने मन्त्रीले पुरानो निर्णयलाई खारेज गर्ने नेपालको दुश्चक्र परिवर्तन हुने अवस्था छैन ।’
सन् २०२१ मा शुरुवात गरिएको जीटुजी मोडलबाट हालसम्म १ हजार १ सय ७५ जना नेपाली मात्र इजरायल आएको भन्दै खिचातानी नगरी नेपालीको रोजगारीको प्रबन्ध गर्न पनि उनीहरुको आग्रह छ ।
एक महिनाको तलब २ लाख रुपैयाँ हुने इजरायल राम्रो कमाइ र महिलाहरुका लागि सुरक्षित गन्तव्य मानिएको छ । हाल भियतनाम, थाइल्याण्ड, श्रीलंका र भारतलगायतका मुलुकबाट मात्र १० हजार बढी कृषि र कन्स्ट्रक्सनमा कामदारहरु गइसकेका छन् ।
गत अक्टुबर ७ तारिकमा गाजापट्टी र इजरायलको सिमानामा हमासका लडाकुले आक्रमण गर्दा हालसम्म ११ सय बढी इजरायली र १० जना नेपाली विद्यार्थीको ज्यान गएको छ । युद्ध अहिले पनि गाजाका भित्रि भाग र लेबनानको सिमानामा जारी नै छ । तर इजरायलभित्र अक्टुबर ७ पछि कसैको पनि मृत्यु भएको छैन । इजरायलका प्रधानमन्त्री बेन्ज्यामिन नेत्यान्याहुले अक्टुर ७ मा अपहरणमा परेका १ जना नेपालीसहित १ सय ३४ जना इजरायली बन्दीको रिहाइ नभएसम्म युद्धविराम नहुने अडान राखेका छन् । त्यसले सिमानामा लडाइँ अझै लामो समय हुने संकेत देखिएपनि इजरायलभित्र कुनै समस्या नरहेकाले नेपाली कामदार पठाउने विषयमा अलमल गर्न नहुने भनाइ हाल इजरायलमा कार्यरत उदयपुरकी माया घले बताउँछिन् ।
काठमाडौं : वैदेशिक रोजगार विभागले रूसका लागि श्रम स्वीकृति खुला गरेको छ । रूस युक्रेन युद्ध शुरू भएपछि विभागले गत पुस १९ गतेदेखि रूस र युक्रेनका लागि सबै प्रकारका श्रम स्वीकृति रोकेको थियो ।
विभागको फागुन ९ गतेको सचिवस्तरीय बैठकले पुनः श्रम स्वीकृति र म्यानपावर कम्पनीमार्फत रुसको ब्लागोभेचेन्सक शहरमा रहेको सिनोपिक इन्जिनियरिङ रसिया ग्रुप एलएलसी कम्पनीका लागि छनोट भएकालाई फागुन १६ गतेदेखि अन्तिम श्रम स्वीकृति दिने निर्णय गरेको हो ।
तर यता श्रम, रोजगार तथा सामाजिक सुरक्षामन्त्री डोलप्रसाद अर्यालले हाल कुनै पनि व्यक्ति रुस जान श्रम स्वीकृतिको व्यवस्था नरहेको बताएका छन् । राष्ट्रिय स्वतन्त्र पार्टी (रास्वपा)ले बुधबार आयोजना गरेको काठमाडौंको आँखामा कर्णाली विषय कार्यक्रम उनले हाल रुस जान व्यक्तिगत श्रम स्वीकृतको व्यवस्था बन्द नै रहेको र खुला नगरिएको बताए ।
मन्त्री अर्यालले वैदेशिक रोजगार व्यवसायीले रुस युद्धग्रस्त क्षेत्र होइन भन्ने स्पष्ट पारेको र जोखिम छैन भन्ने मागलाई स्वीकृत दिने अघिल्लो मन्त्रीको पालामा भएको निर्णयका सन्दर्भमा आफूहरु पुनःमूल्यांकनका लागि अध्ययनका क्रममा रहेको जानकारी दिए । सरकार अविछिन्न उत्तराधिकारी हुने र निरन्तर चलिरहने विषयका सन्दर्भमा भने आफू सजग रहेको उनको भनाइ थियो ।
मन्त्री अर्यालले श्रम स्वीकृति लिएर गएका नेपाली नागरिकको उद्धारका हकमा आफ्नो मन्त्रालयले जिम्मेवार हुने र श्रम स्वीकृति नलिइ गएका नागरिकको हकमा परराष्ट्र मन्त्रालयले समन्वय गर्नुपर्ने बताए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies