काठमाडौं : चर्चित लोकदोहोरी गायिका गीता भट्टराई इन्टरनेशनल म्युजिक अवार्डबाट सम्मानित भएकी छन् । गायिका भट्टराई जनवरी ४ मा मलेसियामा प्रियसी म्युजिकले आयोजना गरेको तेस्रो सिल्भर म्युजिक अवार्ड २०२४ मा सम्मानित भएकी हुन् ।
गायिका भट्टराईको ‘चोखो मायामा’ बोलको गीत शीर्ष ५ मा पर्न सफल भएपछि उनलाई प्रियसी म्युजिकले अवार्ड प्रदान गरेको हो । वरिष्ठ लोक गायक चन्द्र शर्माको प्रमुख आतिथ्यतामा भएको उक्त कार्यक्रममा गायिका भट्टराईसँगै अन्य कलाकारहरु पनि सम्मानित भएका थिए । गायिका भट्टराईले उक्त कार्यक्रममा आफ्नो प्रस्तुतिसमेत दिएर दर्शकलाई मनोरञ्जन प्रदान गरेकी थिइन् ।
साथै गायिका भट्टराई राष्ट्रिय लोक सांस्कृतिक संघद्वारा थाइल्याण्डमा आयोजित सांस्कृतिक सम्मान कार्यक्रम र राष्ट्रिय लोक सांस्कृतिक केन्द्रद्वारा सिंगापुरमा आयोजित श्रष्टा सम्मान तथा सांस्कृतिक साझ कार्यक्रममा सम्मानित भएकी छन् ।
गत जनवरी १ मा थाइल्याण्डको बैंककस्थित प्रिन्स होटलमा वरिष्ठ लोक गायक शर्माकै प्रमुख आतिथ्यतामा राष्ट्रिय लोक सांस्कृतिक संघद्वारा आयोजित सांस्कृतिक सम्मान २०८० मा गायिका भट्टराईलाई गीतसंगीतमा पु¥याएको योगदानको कदर गर्दै सम्मान गरिएको हो ।
यस्तै जनवरी २ मा सिंगापुरमा वरिष्ठ लोक गायक शर्माकै प्रमुख आतिथ्यतामा राष्ट्रिय लोक सांस्कृतिक केन्द्रले आयोजना गरेको श्रष्टा सम्मान तथा सांस्कृतिक साँझ २०८० मा पनि गायकिा भट्टराईलाई गीतसंगीतमा पु¥याएको योगदानको कदर गर्दै सम्मान गरिएको हो ।
गायिका भट्टराई यसअघि पनि विभिन्न अवार्डबाट सम्मानित भइसकेकी छिन् । गत पुसमा लामो समयदेखि नेपाली मौलिक गीत, संगीत, कला, साहित्य, पर्यटन र संस्कृतिको क्षेत्रमा आवद्ध भइ आफ्नो सिर्जना, कला र गलाको माध्यमबाट सांगीतिक क्षेत्रलाई बृहत्तर र समृद्ध बनाउन गरेको महत्वपूर्ण योगदानको कदर गर्दै गायिका भट्टराईलाई सांस्कृतिक समाज नेपालले सम्मान गरेको थियो ।
यस्तै उनले ‘जमुना र मोती’ बोलको गीतबाट ‘सहयात्रा तीज म्युजिक अवार्ड २०७५’मा सर्वोत्कृष्ट अवार्ड, ‘मेलोडी म्युजिक अवार्ड २०७७’मा सर्वोत्कृष्ट गायिका, ‘ए ठूले’ बोलको गीतबाट ‘हिमालयन इन्टरनेशनल नेपाली म्युजिक अवार्ड २०७८’मा सम्मान, ‘माया जालमा परें’ बोलको गीतबाट ‘स्टार इन्टरनेशल अवार्ड २०७८’मा उत्कृष्ट अवार्ड, ‘चन्द्रागिरि घुम्न जाँदा’ बोलको गीतबाट ‘तेस्रो एपिक म्युजिक अवार्ड २०७८’मा सम्मान पाएकी छिन् ।
गायिका भट्टराईले लोक दोहोरी, लोक पप, तीज, रक, आधुनिकलगायतका विभिन्न विधाका गीतमा आफ्नो सुमधुर स्वरको जादु देखाउँदै आएकी छिन् ।
दोहा, कतार : नेपालमा मेला महोत्सवमा व्यस्त रहेका दुर्गेश थापा कतार आइपुगेका छन् l आफ्नो गायन र नृत्यलाई सँगसँगै प्रस्तुत गरेर स्टेज तताउन सक्ने “पफर्मर”को छवि बनाएका दुर्गेशले फेब्रुअरी ९ तारिक शुक्रबार साँझ सांगीतिक प्रस्तुति दिँदै छन् l
कतारको सल्वा रोडको ठिक पछाडि रहेको आइभोरी होटेलमा अवस्थिति भ्यालभेट लन्ज एन्ड क्लबको आयोजनामा "भ्यालभेट नाइट"मा उनले आफ्नो सांगीतिक प्रस्तुति दिनेछन् l
आफ्नो सांगीतिक प्रस्तुति दिन कतार आइपुगेका दुर्गेशले कतारमा रहेका सबै नेपाली दाजुभाइ तथा दिदीबहिनीहरूलाई कार्यक्रममा निमन्त्रणा गरेका छन् । दुर्गेशको स्वागतका लागि क्लब सञ्चालक तथा कार्यक्रमका व्यवस्थापक उत्तम गुरुङ, कार्यक्रमका संयोजक तिलु शर्मा पौडेललगायतका सञ्चारकर्मी तथा अन्य व्यक्तिहरू एयरपोर्ट पुगेका थिए ।
कार्यक्रमको ढोका साँझ ५ बजेबाट खुल्ने र साँझ ६ बजेबाट सांगीतिक कार्यक्रम सुचारु हुनेछ । सांगीतिक व्यस्तताले शुक्रबार राति नै नेपाल फर्कने तालिका रहेको र १० बजेभित्र कार्यक्रम समापन गर्नुपर्ने भएको हुँदा कार्यक्रम निर्धारित समयमै शुरु हुने संयोजक पौडेलले मध्यान्ह दैनिकलाई जानकारी दिए l
कार्यक्रममा प्रवेश शुल्क पुरुषका लागि कतारी रियाल ५० कायम गरिएको छ भने महिलालाई शुल्क लाग्ने छैन l पुरुषको टिकट क्लबको काउन्टरमा बुझाएर एउटा "सोबिनियर ड्रिंकस" सित्तैमा लिन सकिने व्यवस्था क्लबले मिलाएको छ l
तिलु शर्मा पौडेल/मध्यान्ह
दोहा, कतार : मानवीय जीवनमा मानिसहरूले फरक–फरक कर्म एकै जीवनमा गरेका हुन्छन् । मानिसले गर्ने हरेक कार्य सिद्ध नहुन सक्छन्, तर प्रयासलाई नछाड्ने हो भने मेहनतले एक दिन सफलताको शिखरमा पुर्याउँछ भन्ने उदाहरण हुन् गजमान र गोपी माया गुरुङका एक्ला छोरा प्रवीण गुरुङ ।
सन् १९७९ जुन ८ मा चितवनको राईगञ्जमा जन्मिएका उनी भूतपूर्व भारतीय लाहुरे हुन् । साढे सात वर्षसम्म ‘गोर्खा पल्टन’ भनेर चिनिएका भारतीय सेनाका यी जवान सन् २००४ मा कतार पुगे । कारण थियो– कतारस्थित अमेरिकी सैनिक क्याम्पको सुरक्षा गर्नु । उनले ६ वर्ष सुरक्षागार्डका रूपमा काम गरे । जुझारु र लाहुरे स्वभावले भरिएका गुरुङले कतारको जागिरबाट बचेको अर्थलाई व्यवसायमा लगाए । उनलाई व्यावसायिकरुपमा स्थापित भने दोहाको समसारा थकाली भान्छा घरले गराइदियो ।
व्यवसाय सोचेभन्दा राम्रो भएपछि गुरुङले जागिर छोडिदिए । बिस्तारै उनले रियल स्टेट, कन्स्ट्रक्सन, हस्पिटालीटी, कन्सल्टेन्सीलगायतका व्यवसाय सञ्चालन गर्दै गर्दा थाहै नपाइ उनी गीतसंगीततिर ढल्किए । आफूले गाउने नाच्ने नगरे पनि कला र कलाकारलाई रगतमा बोकेर हिँडेका गुरुङले नेपालदेखि कतारका विभिन्न सांस्कृतिक कार्यक्रमको आयोजक, सहयोगी बन्दै ठूलो रकम लगानी गरेका छन् । सन् २०१७ मा नेपाल आइडल सिजन १ को ग्राण्ड फिनाले कतारमा सम्पन्न गर्न सकिन्छ भन्ने साहसिला युवा यीनै गुरुङ थिए । उनको परिकल्पना तथा लगानीमा उक्त ग्राण्ड फिनाले सम्पन्न भएको हो ।
उनको नशामा गीतसंगीतको रस यसरी बग्यो कि उनले आफू आवद्ध गैरआवासीय नेपाली संघ (एनआरएनए)मा समेत कला र संगीतलाई बलियो स्थान दिँदै गए । सामाजिक संस्था र कार्यमा सक्रिय गुरुङले सन् २०१८ को डिसेम्बरमा पुनः दि भोइस अफ नेपालको पहिलो सिजनको ग्राण्ड फिनालेलाई कतारमा भित्र्याए । दुवै रियालिटी सोका ग्राण्ड फिनाले कतारमा सम्पन्न गर्ने यीनै गुरुङले कला र कलाकारका लागि ठूलो रकम लगानी गरेका छन् ।
उनले नेपालबाट बुगीउगी डान्स रियालिटी सोका टप चार र नेपाल आइडल सिजन दुई का टप चार प्रतियोगी कलाकार ल्याएर कतारमा सन् २०१९ मा नेपाल आइडल र बुगीउगी इद फेस्टिभल २०१९ पनि सम्पन्न गरेका थिए । एनआरएनए मध्यपूर्व संयोजक हुँदा नै उनले मध्यपूर्व क्षेत्रीय युवा विभागले आयोजना गरेको ‘ग्लोबल एनआरएन सिंगिङ आइडल, सेकेन्ड जेनेरेसन–२०२१ का परिकल्पनाकार, आइडलका प्रमुख सल्लाहकार तथा अतिथि निर्णायक रही कार्यक्रम सफलतापूर्वक सम्पन्न गरिसकेका छन् ।
फेब्रुअरी २, २०२४ मा ग्राण्ड फिनाले भएको गैरआवासीय नेपाली तारा–२०२३, कतार सिजन ४’मा उनी समुद्घाटन तथा ग्राण्ड फिनालेमा अतिथि निर्णायकका रूपमा रहेका थिए । गीतको सुर, ताल र लयलाई समेत बुझ्न सक्ने गुरुङले प्रतियोगीलाई दिने प्रतिक्रिया निकै चाख लाग्दा र मार्ग निर्देशक हुने गर्दथे । गुरुङले विश्वमा जहाँ पनि गीत संगीत तथा सामाजिक कामका लागि आफूलाई अग्र भागमा राख्ने गरेका छन् । कतारमा उनले मनोरञ्जन क्षेत्रमा योगदान गर्न भने आज पनि भुलेका छैनन् ।
डिजिटल प्लेटफर्मसँगै उदीयमान भएका नवोदित कलाकारका लागि उनले सन् २०२२ मा टिकटक अवार्डसमेत सम्मपन गरेका छन् । उनले गीतसंगीतसँगै व्यवसायलाई पनि सँगसँगै लगेका छन् । कतारको मुग्लिनामा रहेको भीआईपी होटलमा ‘भीआईपी स्टार एण्ड बार’समेत सञ्चालन गरिसकेका उनले एसियाना दोहोरी तथा गजल बार सञ्चालन गरेर करिब एक दर्जन कलाकारलाई प्रत्यक्ष रोजगारी दिएका छन् । उनलाई गीत संगीतको मेरुदण्ड मान्न सकिन्छ । जीवनमा थुप्रै पटक लडेर उठेका गुरुङ व्यवसायमा सफल हुनका लागि इमानदारी र मेहनतलाई नै प्रमुख कारण मान्छन् ।
मध्यान्ह दैनिकसँगको कुराकानीमा उनी आफू लडेर उठेको र लड्दा हात छोडेर जानेहरूलाई धन्यवाद मात्र नभइ आफ्नो अगाडि लड्ने सबैलाई आफूले हात दिने गरेको स्मरण गर्छन् । दुई सन्तानका पिता गुरुङले आफ्नी जीवनसंगीनी सरिता गुरुङकै कारण आफूलाई मेहनत गर्न उर्जा मिल्ने गरेको बताउँछन् । २०१५–१७ मा एनआरएनए कतारका उपाध्यक्ष, २०१७–१९ मा मध्यपूर्व उपसंयोजक, २०१९–२०२१ मा मध्यपूर्व संयोजक र २०२१–२०२३ मा सचिवका हैसियतमा कार्य सम्पादन गरेका गुरुङ वर्तमान कार्यसमितिका उपमहासचिव हुन् ।
एनआरएनए अभियानमा लागिरहँदा महाभूकम्प, हावाहुरी, बाढी पहिरो, कोभिड–१९ लगायत दैवी विपत्तीको समयमा स्वयम् उपस्थित भइ गैरआवासीय नेपाली संघको नेतृत्व गर्दै अस्थायी तथा स्थायी बासस्थान, खाद्यान्न, स्वास्थ्य सामग्रीलगायत विभिन्न राहत सामग्री वितरणमा जुटेका थिए । उनले नेपालको बारा र पर्सा जिल्लामा हावाहुरीले तहशनहश पार्दा घरबारविहीन बनेका करिब पाँच सय घरपरिवारलाई राहत वितरण र उद्धारसमेत गरेका थिए ।
हालै जाजरकोट र रुकुममा गएको भूकम्पमा पनि उनी आफैं पुगेर करिब चार सयभन्दा बढी घरधुरीलाई राहत वितरण गरे भने अस्थायी टहरा निर्माण गरेर फर्किए । कोरानाले विश्व आतंकित बनेका बेला मध्यपूर्वमा रहेका केही महिला तथा बालबालिकाहरूलाई चार्टर्ड फ्लाइटबाट स्वदेश फिर्तीका लागी गुरुङले संयोजन गरेका थिए भने कोरोनाकालमै मध्यपूर्वबाट अक्सिजन सिलिन्डर नेपाल पठाउन उनको आर्थिकलगायत महत्वपूर्ण साथ र योगदान रहेको छ ।
उनले आठौं राष्ट्रिय खेलकुद प्रतियोगितामा तेक्वान्दो खेलको प्रतिनिधित्व गर्दै एनआरएनएको झण्डा फहराउँदै विभिन्न पदक आफ्नो संगठनको नाममा दर्तासमेत गरेका छन् । कुराकानीको अन्त्यमा गुरुङले नेपाली कला, संस्कार, संस्कृतिको अन्तर्राष्ट्रियकरण, बजार व्यवस्थापनका लागि आफू अझै पनि लगानी बढाउन तयार रहेको बताए । उनले विश्वभर रहने नेपालीले आयोजना गर्ने मनोरञ्जनका कार्यक्रम होस् या पीडामा परेका नेपाली, आफ्नो जानकारीमा रहेसम्म सक्दो हर किसिमको सहयोग गर्ने प्रतिबद्धता व्यक्त गरे ।
कतारमा रहेर सामाजिक कार्य र व्यवसाय गर्दै आएका गुरुङ सन् २०२२ मा मलेसियाको क्वालालम्पुरमा सम्पन्न चौथो सन्देश इन्टरनेशनल सोसल अवार्ड कार्यक्रममा सम्मानित भएका थिए । क्रियटिभ मिडिया एण्ड इभेन्ट म्यानेजमेन्ट प्रा.लि.ले उक्त विधामा विगत २ दशकदेखि सामाजिक तथा परोपकारी क्षेत्रमा पुर्याएको योगदानको कदर स्वरूप उनलाई उक्त सम्मान गरेको हो । त्यस्तै गुरुङ चलचित्र विकास बोर्डले आयोजना गरेको नेपाल फिल्म महोत्सव यूएईको कार्यक्रममा समेत उनी सम्मानित भइसकेका छन् । कार्यक्रममा एनआरएनएका गुरुङसहित एनआरएनए मध्यपूर्व संयोजक मनोज कुमार श्रेष्ठ, एनआरएनए यूएईका अध्यक्ष ठाकुर ढुंगाना ‘सोसियल अवार्ड २०२३’बाट सम्मानित भएका थिए ।
फेडेरेसन अफ इन्टरनेशनल नेपाली युथ इन्टरप्रेनरसिप (फिन्या)ले यल्लो प्यागोडा होटलमा आयोजना गरेको बृहत् अन्तरक्रिया कार्यक्रममा पनि गुरुङलाई ‘फिन्या बेस्ट सोसियल इन्टरप्रेनरसिप अवार्ड २०२३’बाट सम्मानित गरिएको थियो । गुरुङलाई गैरआवासीय नेपालीको हक हितमा उत्कृष्ट कार्य गरेको र देश विकासका लागि ठूलो योगदान गरेकोमा सम्मानित गरिएको थियो । कार्यक्रमका प्रमुख अतिथि परराष्ट्रमन्त्री एनपी साउद र फिन्याका अध्यक्ष स्वतन्त्र प्रताप शाहले गुरुङलाई सम्मान गरेका हुन् । कतारमा सम्पन्न ‘स्टार इन्टरनेशनल अवार्ड २०१९’मार्फत ‘बिजनेस अवार्ड २०१९’बाट गुरुङ सम्मानित भएका थिए । थुप्रै सामाजिक, वैचारिक तथा जातीय संस्थाबाट सम्मानित गुरुङ गैरआवासीय नेपाली तारा–२०२३, कतार सिजन ४ मा समेत सम्मानित भएका थिए ।
काठमाडौं : सत्यराज चौलागाईं निर्देशित फिल्म ‘बिच्छेद’ले सर्वोत्कृष्ट छायाँकारबाट सङ्कल भुजेल तथा सर्वोत्कृष्ट लेखक/स्कृप्टबाट सत्यराज चौलागाईं र मुकुन भुसालले सोमबार चितवनको सौराहामा सम्पन्न ‘दक्षिण एसियाली चलचित्र महोत्सव २०८०’मा पुरस्कार जितेको छ ।
मुकुन भुसाल र लक्ष्मी बर्देवाको मुख्य भूमिका रहेको फिल्ममा हिउँवाला गौतम, लय संग्रौला, प्रिया रिजाल, सुष्मा निरौला, जीवन थापा, सरिता राजोपाध्याय, लक्ष्मीनाथ तिमिल्सिना, जयराम सापकोटालगायतको अभिनय छ ।
सामाजिक विषयमा बनेको फिल्म ‘बिच्छेद’को निर्मातामा राज कुमार पण्डित, दिमेश श्रेष्ठ, सुवास राई र सावित्री बज्राचार्य छन् भने सह–निर्मातामा सन्तोस गिरी र प्रविन राजथला छन् । नविन पुरीले प्रोडक्शन डिजाइन गरेको फिल्म मा भुपेन्द्र अधिकारीको सम्पादन, समीर मियाको भिएफएक्स, किरण तुलाधरको ब्याकग्राउन्ड स्कोर तथा रेनिश फागोको कलर ग्रेडिङ छ । फिल्मको प्रदर्शन मिति फाइनल हुन बाँकी छ ।
काठमाडौं : समूह गायनमार्फत स्थापित नेपालको पुरानो र चर्चित ब्यान्ड ‘मंगोलियन हार्ट’ले ५ वर्षपछि दक्षिण कोरियामा कन्सर्ट गर्ने भएको छ । गत अप्रिलमा १० वर्षपछि अष्ट्रेलियामा सांगितिक यात्रा गरेको ब्यान्ड अहिले आफ्नो प्रस्तुति दिन दक्षिण कोरिया जाने भएको हो ।
आगामी शुक्रबार दक्षिण कोरियाको सियोलको छोहरा ओगमास्थित ब्यान्डले डोँगदे मुनमा सांगीतिक प्रस्तुति दिने तय भएको ब्यान्डका म्यानेजर एवम् गितारिस्ट बबि लामाले जानकारी दिए । नेपाल कोरिया कल्चरल एक्सचेन्ज एशोसिएसनको आयोजनामा हुने गायक राजु लामाको यो ब्यान्डले कार्यक्रममा आफ्ना चर्चित र नयाँ गीतहरु प्रस्तुत गर्ने तयारी गरेको छ । ‘पाँच वर्षपछि दक्षिण कोरिया जान पाउँदा हामी उत्साहित छौं । त्यहाँ दर्शकलाई पक्कै केही सरप्राइज दिनेछौं,’ म्यानेजर लामाले बताए।
यो ब्यान्ड सन् १९९२ मा स्थापना भएको थियो । ‘बाँदलपारीको देशबाट’, ‘म माया लाउँदिन’, ‘हल्ला चलेछ’, ‘तिमीलाई देखेर’, ‘पर्खाइमा’, ‘सायद तिम्रो बाटोमा’, ‘म माया लाउँदिन’, ‘उँभो उँभो खासा’ आदि मंगोलियन हार्टका चर्चित गीतहरु हुन् ।
काठमाडौं : राष्ट्रपति रामचन्द्र पौडेलले नेपाली संगीतमा नेपाली लोकजीवन, मौलिकपनको विकास र विस्तार एवम् संरक्षण गर्नुपर्ने बताएका छन् ।
नातिकाजी स्मृति समाजले शीतलनिवासमा सोमबार आयोजना गरेको नातिकाजी राष्ट्रिय संगीत सम्मान तथा पुरस्कार वितरण समारोहलाई सम्बोधन गर्दै राष्ट्रपति पौडेलले नेपाली संगीतमा विभिन्न जातजातिका बाजा, भाका, गीत, संगीतका आफ्नै परिवेश, मौलिक धुन, विशिष्ट शैली र महत्व रहेको र त्यसको जगमा नै नेपाली राष्ट्रिय संगीतको विकास हुँदै आएको धारणा व्यक्त गरे ।
“सिर्जना राष्ट्रका सम्पदा, संस्कृति राष्ट्रका पहिचान र कलाकार राष्ट्रका अमूल्य निधि हुन्”, उनले भने, “कलाकार सिर्जना र संस्कृतिका संवाहक हुन्, कलाकारका साधनाबाट सिर्जित सिर्जनाले राष्ट्रको पहिचान स्थापित गर्नेगर्छ ।”
उनले नेपालको भौगोलिक विविधता र सांस्कृतिक विशिष्टता नै विश्वमा पृथक पहिचानका रुपमा रहेको र यहाँको बहुजातीय, बहुभाषिक र बहुसांस्कृतिक विशेषता विश्वमै नमूना रहेको उल्लेख गर्दै नेपाली समाजको विविधतालाई यिनै लोकसंस्कृति, गीत र संगीतले एकढिक्का बनाउन सघाएको बताए ।
राष्ट्रपति पौडेलले नेपाली लोक भाका पछ्याउँदै नेपाली आधुनिक गीत संगीतको सिर्जनामा नातिकाजीले पुर्याएको योगदान अतुलनीय रहेको स्मरण गरे । नेपाली गीत–संगीतको क्षेत्रमा जीवनभर लाग्ने स्रष्टालाई राज्यको तहबाटसमेत उचित महत्व दिँदै जानु नेपाली राष्ट्रिय हितकै विषयसमेत भएको उनले बताए ।
सो समारोहमा नातिकाजी स्मृति समाजका अध्यक्ष शम्भुजित बास्कोटाले यो सम्मानबाट कला क्षेत्रलाई थप उत्प्रेरणा मिलेको बताए । उनले स्रष्टाहरुका नाममा राज्यले पनि पुरस्कार स्थापना गरेर नवप्रतिभा तथा राष्ट्रका समग्र प्रतिभालाई प्रेरणा प्रदान गर्नुपर्ने सुझाव दिए ।
अध्यक्ष बास्कोटाले स्रष्टाहरुका सिर्जनाको सुरक्षा हुन नसकेको तथा मुलुकका स्रष्टाहरुले राम्रोसँग रोयल्टी पनि पाउन नसकेकाले यस विषयमा राम्रो कानूनको आवश्यकता रहेकामा पनि जोड दिए ।
सो समारोहमा नातिकाजी राष्ट्रिय विशिष्ट संगीत सम्मान वरिष्ठ गीतकार आनन्द अधिकारी, वरिष्ठ वाद्यवादक केशव सुनाम, वरिष्ठ गीतकार भुषण खरेल, वरिष्ठ गीतकार सुनिल थापा, वरिष्ठ परम्परागत वाद्यवादक धर्म मुनिकार, वरिष्ठ गायक सुदेश शर्मा, वरिष्ठ वाद्यवादक कुमार सिंह र सुवर्ण लिम्बू, वरिष्ठ गीतकार राम भट्टराई र वसन्त वित्यासी थापालाई प्रदान गरिएको थियो ।
त्यस्तै, नातिकाजी राष्ट्रिय संगीत पुरस्कार गीतकार विजय शिवाकोटी, संगीतकार राजनराज शिवाकोटी, गायक शिशिर योगी र बानिका प्रधानलाई प्रदान गरिएको थियो । त्यसैगरी, नातिकाजी राष्ट्रिय प्रतिभा पुरस्कार गायक सञ्जय टुम्रोक, गायिका रचना रिमाल, संगीतकार शशिविक्रम थापा, गीत रेकर्डिष्ट प्रकाश मिश्रलाई तथा नातिकाजी राष्ट्रिय लोकसंगीत पुरस्कार लोकगायक अमृत खाती र नातिकाजी राष्ट्रिय कला पत्रकारिता पुरस्कार शान्ति प्रिया र कृष्ण भट्टराईलाई प्रदान गरिएको थियो ।
काठमाडौं : बक्स अफिस फिल्म तथा म्युजिक प्रमोशन कप फुटबल प्रतियोगिता शनिबारबाट शुरु भएको छ । राष्ट्रिय चलचित्र पत्रकार संघले बक्स अफिस फुटबल एकेडेमीमा रिलिजको संघारमा रहेका नेपाली फिल्म, टेलिफिल्म, गीत संगीत तथा विभिन्न संघ संस्थालाई समेटेर आयोजना गरेको प्रतियोगिता वर्षैभरि हरेक शनिबार र बुधबार सञ्चालन हुनेछ ।
नियमितरुपमा बक्स अफिस फिल्म कल्ब नेपालले आयोजना गर्ने गरेको प्रतियोगिता २०८० संस्करणबाट भने सम्पूर्ण आयोजनाको स्वामित्व राष्ट्रिय चलचित्र पत्रकार संघले लिएको हो । यस्तै प्रतियोगितामा बक्स अफिसको व्यवस्थापन र ग्लोबल एक्ट्रेस फ्रेडेसन (विश्व कलाकार महासंघ)को सहकार्य रहेको छ । शनिबार (होम) ५५ र बुधबार (अवे) ५५ खेल गरी प्रतियोगितामा कूल ११० खेल सञ्चालन हुने छ ।
२०८० संस्करण अन्तर्गत माघ २० गते शनिबार शुरु भएको प्रतियोगिताको पहिलो खेल सम्पन्न भएको छ । शनिबार फागुन २५ गते एउटै मितिमा रिलिजको तयारीमा रहेको नायिका रेखा थापाको निर्माण र वरिष्ठ निर्देशक ज्ञानेन्द्र देउजाले पछिल्लो पटक निर्देशन गरेको चलचित्र ‘उपहार’ र नवल खड्काको राष्ट्रवादी चलचित्र ‘काँडेतार’बीच प्रतिस्पर्धा भएको थियो । उक्त खेलमा काँडेतारले उपहारलाई ४–३ गोलअन्तरले पराजित गर्यो ।
खेलमा चलचित्र काँडेतारले स्पोनसर गरेको जर्सीमा पदम दर्नाल, राधाकृष्ण कटुवाल, सुर्य खड्का, हरिचन्द्र फुयाल, जीवन शाही, केदार खड्का, जोन राई, श्याम श्रेष्ठले उत्कृष्ट खेल प्रस्तुत गरेका थिए भने चलचित्र उपहारले सौजन्य गरेको टिमबाट विश्वनाथ योन्जनको कप्तानीमा विकास पुजारी, गणेश श्रेष्ठ, शंकर खड्का, सिजन कुँवर, लोकेन्द्र लिम्बू, नवराज तामाङ, रामशरण श्रेष्ठ, विष्णु बहादुर राईले उत्कृष्ट खेल प्रदशन गरेका थिए । खेलको म्यान अफ म्याचको सम्पूर्ण रकम ७ हजार ५ सय रुपैयाँ ‘दुलही’ टेलिचलचित्रका कलाकार सुकुराम स्याङ्तान (च्याङ्बा)ले उपलब्ध गराएका थिए ।
प्रतियोगिताको असल ज्येष्ठ खेलाडी गीतकार तथा कलाकार विश्वनाथ योन्जनलाई प्रायोजक दुलही टिमले मैदानमा म्यान अफद म्याचको पुरस्कार हस्तान्तरण गरेका थिए भने प्रायोजक दुलहीको निर्माण कम्पनी तथा कलाकारलाई पनि आयोजक राष्ट्रिय चलचित्र पत्रकार संघका अध्यक्ष आरके सुवेदी, वरिष्ठ कलाकार हरिचन्द्र फुयाल, संगीतकर्मी तथा व्यवसायी रविन गहतराज इलाइटका संस्थापक श्याम श्रेष्ठले खादा लगाएर मायाको चिनोसहित सम्मान गरेका थिए ।
तिलु शर्मा पौडेल/मध्यान्ह
दोहा, कतार : ‘गैरआवासीय नेपाली तारा–२०२३, कतार सिजन ४’को गायन विधातर्फ रुस्तम तामाङ र नृत्य विधातर्फ निरु श्रेष्ठले उपाधि चुमेका छन् । शुक्रबार कतारको अल लक्तामा अवस्थित ट्युनिसीयन स्कुलको हलमा सम्पन्न ग्राण्ड फिनालेमा गायनबाट उपविजेता सुजन गुरुङ र नृत्य विधातर्फ सरोज लामा उपविजेता बन्दा उनीहरूले ताराको उपाधि चुमेका हुन् ।
राष्ट्रिय आविष्कार केन्द्रको सहयोगार्थ आयोजना गरिएको प्रतियोगिताका गायन विधाका विजेताले १ लाख ८१ हजार र नृत्य विधाका विजेताले १ लाख ५० हजार रुपैयाँ नगद पुरस्कारसहित ट्रफी प्राप्त गरे भने उपविजेताले जनही ७५ हजार रुपैयाँ प्राप्त गरे ।
१ डिसेम्बर २०२३ शुक्रबार पहिलो अडिसन लिँदै शुरु भएको प्रतियोगितामा कूल ४७ जना सहभागी भएका थिए भने ग्राण्ड फिनालेमा नृत्य विधामा जुनमाया कुमाल, सरोज लामा, निरु श्रेष्ठ, झरना राई र सौजन चाहारले उपाधिका लागि प्रतिस्पर्धा गरेका थिए । गायन विधामा दीपक कुमार घले, इसान रेग्मी, सुजन गुरुङ, मानसिंह परियार र रुस्तम तामाङले उपाधिका लागि प्रतिस्पर्धा गरेका थिए ।
सुनखानी ५ सिन्धुपाल्चोकमा जन्मिएका रुस्तम एक दशकदेखि कतारमा कार्यरत छन् । नागार्जुन १ काठमाडौंमा बसोबास गर्दै आएका उनी स्कुले जीवनकालदेखि गाउन शुरु गरेको स्मरण गर्छन् । आफ्ना कुनै पनि एल्बम सार्वजनिक नगरे पनि थुप्रै स्टेजमा प्रस्तुति दिएको अनुभव उनीसँग छ । अडिसन राउण्ड रामकृष्ण ढकालको गीत गाएर छनोट भएका उनी ग्राण्ड फिनालेमा अतिथि निर्णायक रूपमा ढकाललाई पाउँदा खुसी मात्र भएनन् उनको गायिकीको ढकालले तारिफ गर्दा फुरुङ्ग परेका उनी ढकालकै हातबाट आफूले जितेको पुरस्कारको राशि थाप्दा निकै खुसी देखिए । उनले पुरस्कारको राशि गीतसंगीतमै खर्च गर्ने बताए ।
इलामको बिब्लाटे डाँडा गाउँमा जन्मिएकी निरु श्रेष्ठ विगत चार सालदेखि कतारमा श्रमिकका रूपमा कार्यरत छिन् । बच्चा हुँदादेखि नै नृत्यमा सौखिन उनले थुप्रै स्टेजमा आफ्नो कला प्रस्तुत गरे पनि प्रतिस्पर्धामा भने पहिलो पटक भाग लिएर पहिलो पटक नै उपाधि जितेकी हुन् । नेपालबाट अतिथि निर्णायकका रूपमा आएकी नायिका मोडल पूर्णिमा श्रेष्ठले पनि उनको नृत्यको तारिफ गरिन् । उनले उपाधिको रकम कहीँ न कहीँ सकारात्मक काममै खर्च गर्ने बताइन् ।
गैरआवासीय नेपाली संघ (एनसीसी) कतार र तमु (गुरुङ) समाज कतारको संयुक्त आयोजनामा आयोजित ‘गैरआवासीय नेपाली तारा– २०२३ कतार सिजन ४’को ग्राण्ड फिनाले संघका अध्यक्ष रमेश भट्टको सभापतित्व तथा कतारका लागि नेपाली राजदूत नरेश विक्रम ढकालको प्रमुख आतिथ्यतामा सम्पन्न भएको हो । विधिवतरूपमा अगाडि बढेको कार्यक्रममा तमु समाजकी अध्यक्ष टौमाया गुरुङले स्वागत मन्तव्य राखेकी थिइन् भने स्वागत नृत्य र स्वागत गीतद्वारा उपस्थितलाई स्वागत गरिएको थियो । नेपालबाट अतिथि निर्णायकका रूपमा कतार आएका अतिथि निर्णायक ढकालले आफ्ना कालजयी गीतमार्फत उपस्थितलाई मनोरञ्जन प्रदान गरे भने अर्की निर्णायक श्रेष्ठले पनि मसुप गीतमा आकर्षक नृत्य पेस गरिन् ।
आफ्नो शुभकामना मन्तव्य राख्दै प्रमुख अतिथि ढकालले यो प्रतियोगिता एक नमुना मात्र नभइ पृथक कार्यक्रम बनेको बताउँदै कार्यक्रमका लागि हल व्यवस्थापन गरिदिने कतार च्यारिटीलाई कृतज्ञता प्रकट गरे । एनआरएनए आईसीसीसहित कतारमा स्थापित विभिन्न सामाजिक, सामुदायिक वैचारिक संगठनका अध्यक्ष तथा विभिन्न ओहोदाका व्यक्तित्वहरूको विशेष आतिथ्यता रहेको थियो भने उनीहरुले शुभकामना मन्तव्य राखेका थिए ।
कमलमणि गुरागाईं, क्रान्ति सिंह, करिम बक्स मियाँ र बुधबल गुरुङ परीवेक्षक रहेको कार्यक्रममा आइडलका गायन विधाका निर्णायक मङ्गल बिक र वीरेन्द्र श्रेष्ठले समेत सांगीतिक प्रस्तुति दिए । नृत्य विधाका निर्णायक भविन तामाङ, भीम प्रसाद गुरुङ र जनक थापा मगरसहित टौमाया गुरुङ, शिला गुरुङ र सोनी आले मगरले सामूहिक नृत्य पेस गरे । नेपाल मगर संघ शाखा कतार, नेपाल प्रवासी तामाङ समाज र तमु (गुरुङ) समाज कतारका कलाकारहरूले सामूहिक नृत्य पेस गरेका थिए भने गोबिन गुरुङले आफ्नो गायिकीमार्फत उपस्थितलाई झुमाएका थिए ।
कार्यक्रमका सभापति र प्रमुख अतिथिलाई फेटाद्वारा सम्मान गरिएको थियो भने ग्राण्ड फिनालेमा पुग्न सफल दश प्रतियोगी, अतिथि निर्णायकसहित वीरेन्द्र श्रेष्ठ, गुन्जन तामाङ र मङ्गल विक, भबिन तामाङ, भीम प्रसाद गुरुङ र जनक लाफा मगरलाई पनि मायाको चिनोसहित सम्मान गरिएको थियो । चार चरणमा सम्पन्न आइडलका अतिथि राज रेग्मी, प्रभात त्रिपाठी, ग्राण्ड फिनालेका अतिथि निर्णायकद्वय एनआरएनए आईसीसीका उप– महासचिव प्रवीण गुरुङ र नरेन्द्र बहादुर भाटलाई समेत सम्मान गरिएको थियो ।
संघका महासचिव रबिन मगरले औपचारिक र भानु शर्माले सांगीतिक कार्यक्रमलाई सहजीकरण गरेका थिए । कार्यक्रम समापन गर्दै सभापति भट्टले प्रतियोगिताका विजयीहरूलाई शुभकामना दिँदै आइडललाई सफल बनाउन विभिन्न कोणबाट सहयोग गर्ने सबैप्रति कृतज्ञता प्रकट गरेका थिए ।
काठमाडौं : सञ्चारकर्मी अनिल नेपालीको सामाजिक कथामा आधारित गीत ‘रुवाउने माया’ सार्वजनिक भएको छ । सर्वोत्तम च्यानल युट्युबमार्फत सार्वजनिक भएको गीतमा गरिब र निःसन्तान दम्पत्तीलाई एक–अर्काको मायाले कसरी रुवाउँछ भन्ने कथा प्रष्टरुपमा देखाइएको छ ।
मार्मिक शब्द संयोजन रहेको गीतमा सधैंका लागि गाउँ छोड्ने र सधैंका लागि देश छोड्नेबीचको आकस्मिक प्रेमले अनन्त रुन परेको कथा पनि सरल तरिकाले देखाइएको छ ।
‘स्वस्थानी’ कथामा गोमा र शिवको वियोगान्त बिछोडजस्तै पवित्र प्रेमको खोजीमा भौतारिँदै हिँडेकी कथाकी मूल पात्र पवित्रा र डा.पल्लवको वियोगान्त बिछोड भएकाले श्री स्वस्थानी व्रतकथा श्रवणको मौसमसँगै गीत सार्वजनिक गरिएको अनिले बताए ।
उक्त गीतमा लय तथा शब्द अनिल स्वयंको छ भने स्वर अनिल र अनुजा पुडाशैनीको रहेको छ । दिलिप परियार र मिना परियारको मुख्य अभिनय रहेको भिडियोलाई अनिलले नै निर्देशन गरेका हुन् भने कलाकार लोकेश एन.पी.ले छायाँकन गरेका हुन् ।
भिडियोको सम्पादन मिन रावलले गरेका छन् भने संगीत एरेन्ज विष्णु तामाङले गरेका हुन् । यसअघि अनिलका साइँली, पियारा तिमी आउँछौं कहिले, सम्झिने नि मै छु, धागो चङ्गामा, जय जय शिवजस्ता गीतहरु श्रोतामाझ आइसकेका छन् । एक दशकदेखि सञ्चार क्षेत्रमा क्रियाशील उनका दैनिक पत्रपत्रिकामा लेख, रचना प्रकाशनसँगै आधा दर्जन साहित्यिक कृति प्रकाशित छन् ।
काठमाडौं : बाबुछोरीको पारिवारिक कथा बोकेको 'चित्रा' फिल्मको अष्ट्रेलियामा रेड कार्पेट प्रिमियर हुने भएको छ । निर्माण पक्षले दिएको जानकारी अनुसार फिल्मको फेब्रुअरी ९ तारिकमा अष्ट्रेलियाको तासमानिया राज्यको भिलेज सिनेमाज् इस्टल्यान्डस, रोसनी पार्कमा प्रमियर हुनेछ ।
निर्माताबाट अभिनेतामा डेब्यू गरेका सन्तोष अधिकारीले सो प्रिमियरमा सो शहरका मेयरसहित केही कलाकारहरु समेत सहभागी हुने जानकारी दिएका छन् । फिल्मबाट मिलेको प्रतिक्रियाबाट हौसिएका अधिकारीले आफ्नो कर्मभूमि अष्ट्रेलियाका फिल्ममेकरले जन्मभूमि नेपाललाई आफ्नो छायाँकन गन्तव्यका रुपमासमेत चिनुन् भन्ने उदेश्यले सिनेमाको प्रिमियर गर्न लागिएको जानकारी दिए । उनले पर्यटनलाई पनि केही टेवा मिल्न सक्ने बताए । उनले यसलाई आफ्नो देशका लागि गरेको व्यक्तिगत प्रयास भनेका छन् ।
सो प्रिमियरको टिकटदर ३० अष्ट्रेलियन डलर तोकिएको छ । नेपालको झल्को दिने प्रिमियरस्थल तास्मानियामा भूटानी नेपालीसहितका नेपालीहरुको उल्लेखनीय बसोबास रहेको छ ।
घनश्याम लामिछाने निर्देशित फिल्म पुस २७ गते शुक्रबारबाट सार्वजनिक प्रदर्शनमा आएको थियो । पुस २२ गते गरिएको प्रिमियरमा फिल्मले प्रशंसा बटुलन सफल भएको थियो । यो फिल्ममा डेब्यू अभिनेता सन्तोषका अलावा प्रमोद अग्रहरी, अर्पण थापा, मेनुका प्रदान, शुभेच्छा खड्का, प्रकाश घिमिरे, अञ्जना बराइली, सिम्रन खड्का, आयुशी ढकाल, कुमार गुरुङ, उज्ज्वल ढकालको पनि अभिनय छ । महेश पौडेलको छायाँकन रहेको ‘चित्रा’मा राजनराज सिवाकोटीको संगीत छ भने मनिष गौतमको पटकथा एवम् संवाद लेखन छ ।
चित्राका निर्माता आशिष थापा मगर हुन् भने सन्तोष अधिकारी कार्यकारी निर्मातामा रहेका छन् । यस्तै फिल्मको एसोसिएट निर्मातामा राज श्रेष्ठ छन् । फिल्ममा बनिश शाह र सन्देश शाहको संयूक्त सम्पादन रहेको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies