तिलु शर्मा पौडेल/मध्यान्ह
दोहा, कतार : दर्जनौँ गीतलाई करोड क्लब प्रवेश गराउन सफल गायक, संगीतकार तथा नेपाल आइडलका जज कालीप्रसाद बास्कोटा कतार आइपुगेका छन् । रात्रिकालीन व्यवसायमा सफल व्यवसायीका रूपमा स्थापित युवा व्यवसायी उत्तम गुरुङले सञ्चालनमा ल्याएको भेल्भेट लाउन्ज एन्ड क्लबले आयोजना गरेको "भेल्भेट नाइट" मा आफ्नो सांगीतिक प्रस्तुति दिन काली पहिलो पटक कतार आइपुगेका हुन् ।
अतिथि कलाकारको स्वागतार्थ हमाद विमान स्थलमा क्लब सञ्चालक गुरुङ, पत्रकार रोशन अर्याल लगायतका अन्य व्यक्तित्वहरू पुगेका थिए । अतिथि कलाकारहरूले कतारमा रहेका सबै नेपालीहरूलाई कार्यक्रममा निमन्त्रणा गर्दै सँगै रमाएर कार्यक्रमलाई भव्य बनाइदिन आग्रह गरेका छन् ।
दोहाको मुटु सल्वा रोडमा रहेको जरीर बुक स्टोरको ठिक पछाडि आईभोरी ईन होटेलको चौथो तलामा रहेको क्लबको गेट शुक्रबार दिउँसो ५ बजेबाट खुल्नेछ । पुरुषका लागि ५० कतारी रियाल र महिलाका लागि निःशुल्क प्रवेशको व्यवस्था गरिएको छ । तर क्लब प्रवेशका लागि २१ वर्ष कटेको, म्याद भएको कतारी आईडी कार्ड या पासपोर्ट भने आवश्यक पर्नेछ ।
नेपाली कला र मनोरञ्जनको जगतमा दिवाकर भण्डारी लोकप्रिय नाम हो । कास्की जिल्लाको हालको अन्नपूर्ण गाउँपालिका–२ मा जन्मिएका उनी चर्चित टेलिश्रृंखला ‘मेरी बास्सै’ का कलाकार (सापटी काका), लेखक तथा निर्देशक हुन् । बाल्यकालबाटै कलाकारिता क्षेत्रमा रमाउँदै विगत झण्डै तीन दशकदेखि व्यावसायिकरुपमा यसैमा समर्पित भण्डारीले थुप्रै गीत, सडक नाटक, टेलिचलचित्र र चलचित्रहरूमा विभिन्न विधाको अनुभव सँगालिसकेका छन् । प्रस्तुत छ– दर्जनौं सम्मान, पुरस्कार अनि अवार्डबाट विभुषित भण्डारीसँग उत्तम कार्कीको संवाद :
तपाईंको कलाकारिता यात्राको थालनी कसरी भयो ?
मेरो कलाकारिता यात्राको थालनी निर्दोष उमेरबाटै भएको हो । जतिबेला गाउँघरको औपचारिक पूजाआजा, बिहेबटुलो, चाडबाड आदिमा पुग्थें र रमाइलो गर्दथें त्यतिबेलाबाटै बिउ रोपियो भन्दा हुन्छ । पछि विद्यालयमा हुने अतिरिक्त क्रियाकलापमध्ये गायन, नृत्य र अभिनयमा म तिखारिएँ । आठ कक्षासम्म पुग्दा विद्यालयको साँस्कृतिक कार्यक्रममा प्रायः प्रथम हुन थालें । अनि दशमा पुग्दा त त्यस्ता कार्यक्रमहरूको संयोजनमात्रै गरिनँ, अन्तरविद्यालय, क्षेत्रस्तरीय, जिल्लास्तरीय, अञ्चलस्तरीय आदि कार्यक्रममा सर्वोत्कृष्ट कलाकारको रूपमा चिनिएँ । मैले २०५१ सालमा श्री माछापुच्छ्रे माध्यमिक विद्यालयबाट एसएलसी पास गरेलगतै चेतनामूलक सडक नाटकको लेखन÷निर्देशन गरेको छु ।
त्यो रहरले गर्नुभयो कि पैसाका लागि ?
रहर, चाहना, रुचि, सोख त छदैछ त्यसको अलावा पैसाका लागि व्यावसायिक कलाकारिता पनि भयो नि । त्यतिबेला दैनिक ८० रुपैयाँको दरले काम गरेको मेरो मानसपटलमा अझै ताजा छ ।
अनि त्यसपछि के गर्नुभयो ?
यसरी सडक नाटकलगायतको काम २०५६ सालसम्म गरें । अनि टेलिचलचित्र ‘धुन’ मार्फत अभिनय यात्रा अगाडि बढाएँ । त्यसपछि त दर्जनौ नाटक मञ्चन, लेखन र निर्देशन गरें । २०६१ मा ‘एउटै मिल्यो हजारौं हजारमा...’ र ‘दाइ त हङकङको...’ बोलको गीत समावेश गीति एल्बम ‘एउटै मिल्यो हजारौं हजारमा’ ल्याएँ । यही दौरानमा टेलिचलचित्रमा अभिनय, सहायक निर्देशन तथा निर्देशन गरें ।
जस्तै कहाँ–कहाँ, कुन–कुन भूमिकामा काम गर्नुभयो ?
मैले २०६६ सालमा नेपाली चलचित्र ‘चिनो’ मा अभिनय गरें । २०६७ मा टेलिचलचित्र ‘मेरी गंगा’ को निर्देशन गरें । यसैगरी २०६८ मा चलचित्र ‘राज’, २०६९ मा ‘कन्यादान’ र २०७० मा ‘नाइँ नभन्नु ल–२’ मा अभिनयमार्फत कला–क्षमता माझें । ‘एके फोट्टी सेभेन’ र ‘गडबडी’ माचाहिँ अभिनयका साथै मुख्य सहायक निर्देशन गरें । यस्तै २०७२/७३ मा टेलिचलचित्र ‘ल खत्तम’ मा ७२ भागसम्म अभिनय, लेखन र निर्देशन गरें । २०७३ सालपछि भने मुख्यतः हास्य टेलिश्रृंखला ‘मेरी बास्सै’ मा अभिनय, लेखन र निर्देशन गर्दै आइरहेको छु ।
यी विधामध्ये कुन चाहिँ कठिन हुन्छ ?
कठिन त आ–आफ्नो क्षेत्रमा सवै छन् । तर सवैभन्दा बढी कठिन भनेको निर्देशन हो । कला–मनोरञ्जन क्षेत्रको मियो भनेकै निर्देशन÷निर्देशक हो । यसले सवै विधाका संयोजन र सम्पादन गर्दछ ।
यो क्षेत्रमा लागेर कस्तो अनुभूति भइरहेको छ ?
मलाई त रमाइलो लागेको छ । यसै क्षेत्रमा सन्तुष्ट पनि छु । अहिलेसम्म जेजति पाएको छु, यो सवै कलाकारिता क्षेत्रबाटै पाएको हुँ । पछुताउन पर्नेगरी आजको मितिसम्म केही गुमाएको छन । लाखौं दर्शकको सद्भाव, माया पाएको छु । कलाकारितामा मैले अझै धेरै गर्न बाँकी नै छ । उद्देश्य टाढाकै लिएको छु । अब अन्तर्राष्ट्रिय स्तरको निर्देशक बन्ने लक्ष्य छ ।
समाज–राष्ट्रको पक्षमा के योगदान गर्नुभएको छ त ?
मैले कलाकारिताको माध्यमबाट अहिलेसम्म जेजति असल कर्म गरिरहेको छु यो भनेकै समाज–राष्ट्रको लागि हो । विगत ६ वर्षदेखि ५ जना अनाथ बालबालिकाको अध्ययन÷विद्यालय खर्च पनि व्यहोर्दैआएको छु । यसबाहेक भूकम्प, नाकावन्दी, कोरोना, बाढीपहिरोलगायत महामारी र संकटका बेला सहयोग, उद्धार तथा राहत वितरणजस्ता सामाजिक कार्य समेत गरिरहेको छु । मेरो सास रहेसम्म समाज र राष्ट्रकै हितमा काम गर्छु ।
तपाईंको कामको सही मूल्यांकन भएको छ त ?
अहिलेसम्म त मज्जाले भएको छ । जस्तो कि म नेपाल रेडक्रस सोसाइटी र लोकदोहोरी गीत प्रतिष्ठान नेपालको आजीवन सदस्य छु । लाइन्स क्लब, चलचित्र कलाकार संघ अनि टेलिफिल्म कलाकर्मी मञ्चको सदस्य छु । यस्तै राष्ट्रिय लोक तथा दोहोरी गीत प्रतिष्ठान कास्कीको सचिवालय सदस्य छु । मेरो कला र योगदानको कदरस्वरुप विभिन्न संस्थाले अभिनन्दन, पुरस्कार र अवार्ड सहित सम्मान गरेका छन् । चर्चित कलाकार तथा निर्देशकको हैसियतमा मैले ‘नेशनल टेलिफिल्म अवार्ड–२०७९’, ‘नेपाल टेलिभिजनको ३८औं वार्षिकोत्सव सम्मान’, ‘राष्ट्रिय लोक तथा दोहोरी गीत प्रतिष्ठान कास्कीबाट सम्मान–२०७८’, ‘ढिकुरपोखरी समाज सम्मान–२०७८’, ‘ढिकुरपोखरी युवा क्लब सम्मान–२०७६’ आदि पाएको छु । यस्तै कला–मनोरञ्जनसँग सम्बन्धित कार्यक्रममा कुशल निर्णायकको भूमिका पनि निर्वाह गरेको छु ।
मानसम्मानमात्रै हो कि आर्थिक सवलता पनि भएको छ ?
मानसम्मानको अतिरिक्त आर्थिकोपार्जन पनि राम्रो छ । ममात्रै होइन, नेपालमा अहिले दक्ष, व्यावसायिक कलाकार आर्थिक रुपमा निकै सवल छन् । मेरो कुरा गर्नुहुन्छ भने म यही पेशाबाट समुन्नत छु । आफ्नो, घरखर्च चल्नेमात्रै होइन, राम्रो कमाइ भएकाले वचत पनि राम्रै छ । फेरि, म धेरै विधामा सक्रिय छु, व्यस्त छु । यस अर्थमा म अरुको तुलनामा महँगो भएकाले आम्दानीसमेत राम्रै हुन्छ ।
काठमाडौं : प्रधानमन्त्री पुष्पकमल दाहाल ‘प्रचण्ड’ले वरिष्ठ गायक तथा संगीतकार भक्तराज आचार्यले दिएको योगदानले गीत–संगीतको क्षेत्रमा लामो समयसम्म उत्प्रेरणा र दिशानिर्देशन गरिरहने बताएका छन् ।
आज नेपाल संगीत तथा नाट्य प्रज्ञा-प्रतिष्ठान पुगी आचार्यको पार्थिव शरीर श्रद्धाञ्जलि अर्पण गर्दै प्रधानमन्त्री दाहालले उनको योगदान मुलुकका लागि महत्वपूर्ण रहेको स्मरण गरे । उनले स्व आचार्यको पार्थिव शरीरमा राष्ट्रिय झण्डा ओढाएर सम्मान गरेका थिए ।
प्रतिष्ठानमा बिहान ११ बजेदेखि शुभचिन्तक, गीत-संगीत क्षेत्रका व्यक्तित्व तथा कलाकारहरुबाट आचार्यप्रति श्रद्धाञ्जलि अर्पण चलिरहेको छ । उनको आजै पशुपति आर्यघाटमा दाहसंस्कार गरिने छ ।
भजन शिरोमणि उपाधि पाएका उनको सोमबार ८२ वर्षको उमेरमा निधन भएको थियो । आचार्यलाई उपचारका लागि ललितपुरको मेडिसिटी अस्पताल लैजाने क्रममा बाटोमै निधन भएको हो । गायक आचार्यका दुई छोरा सत्यराज र स्वरूपराज पनि गीत-संगीत क्षेत्रमै छन् ।
विसं १९९९ मा धनकुटामा जन्मिएका आचार्यले चार सयभन्दा बढी गीतमा स्वर तथा संगीत दिएका छन् । नेपाली सुगम संगीतमा उनको महत्वपूर्ण योगदान छ ।
काठमाडौं : आनी छोइङ डोल्माको जीवनी प्रेरित डकुमेन्ट्री ‘आनी छोइङ डोल्मा : नथिङ इम्पोसिबल’ नेपाल इन्टरनेसनल फिल्म फेस्टिभल (निफ)को ओपनिङ फिल्म रहने भएको छ । फेस्टिभल अध्यक्ष केपी पाठकले जेनिफर लिन र सान बाई निर्देशित डकुमेन्ट्री महोत्सवको उद्घाटनसँगै देखाइने फिल्मको रुपमा रहने जानकारी गराएका छन् ।
आनीको सांगीतिक यात्रा, भिक्षु जीवन र समाजसेवालाई डकुमेन्ट्रीले प्रस्तुतिको विषय बनाएको छ । तर निर्देशक लिनले डकुमेन्ट्री आनीको स्वतन्त्रताको प्राप्तिको खोजको रुपमा पनि प्रस्तुत गर्ने प्रयास रहेको बताएकी छिन् ।
हङकङको सिटी युनिभर्सिटीमा आम सञ्चारकी प्राध्यापक लिनले आनीलाई ७ वर्ष पछ्याएर यो डकुमेन्ट्री तयार गरेकी हुन् । सन् २०१० मा गरिबीमा हुर्किएका बालिकाको शिक्षाको लागि आनीले स्थापना गरेको आर्यतारा स्कुलको भ्रमणपछि डकुमेन्ट्री बनाउने सोच पलाएको र यसको ५ वर्षपछि काम थालेको लिनले अन्तर्वाताहरुमा बताएकी छिन् ।
७ वर्ष लगाएर बनाएको डकुमेन्ट्री अहिले विश्वका फिल्म फेस्टिभलमा आकर्षणको केन्द्र रहँदै आएको छ । डकुमेन्ट्रीले गत साल वार्सा इन्टरनेसनल फिल्म फेस्टिभलमा एसियन प्यासिफिक अडियन्स अवार्ड र नेटप्याक अवार्ड जितेको थियो ।
डकुमेन्ट्री निफमा पनि माउन्ट एभरेस्ट अवार्डका लागि प्रतिस्पर्धामा रहेको छ । यो विधामा देश विदेशका १३ वटा डकुमेन्ट्री प्रतिस्पर्धामा रहेका छन् । विजेता चलचित्रले १ हजार नगद राशिको माउन्ट एभरेस्ट अवार्ड प्राप्त गर्नेछन् ।
चैत १ देखि ५ गतेसम्म चल्ने चलचित्र महोत्सवमा यो साल ४० देशका ८८ फिल्म प्रदर्शन हुँदैछन् । प्रतिस्पर्धामा रहेका फिल्मको प्रदर्शनसँगै महोत्सव अवधिभर फिल्म निर्माणका विभिन्न विधासँग सम्बन्धित रहेर कार्यशाला, छलफल र अन्तक्र्रियाका कार्यक्रम पनि आयोजना गरिने पनि आयोजकले जनाएको छ । महोत्सवमा प्रदर्शन हुने चलचित्र क्यूएफएक्स सिनेमाका शाखाहरु सिभिल मल,लबिम मल, भक्तपुर र छायाँ सेन्टरका हलमा प्रदर्शन हुनेछन् ।
काठमाडौं : संगीतकार संघ नेपालको १२औं साधारण सभाले केन्द्रीय सचिव पदमा चर्चित संगीतकार शंकर थापा ‘स्माइल’लाई मनोनीत गरेको छ । राजधानीमा सम्पन्न कार्यक्रममा थापा सर्वसम्मत निर्णयबाट सचिव पदमा मनोनीत भएका हुन् ।
सचिव पदमा मनोनीत भएलगत्तै थापाले संगीतकार संघको कार्यालयमा पद तथा गोपनीयताको सपथ लिनुका साथै कार्यभार ग्रहण गरेका छन् । उनलाई संघका अध्यक्ष चेतन सापकोटा, महासचिव बसन्त सापकोटा, कोषध्यक्ष राजेश थापालगायतका पदाधीकारीहरुले स्वागत गरेका थिए ।
गत वर्ष सम्पन्न निर्वाचनमा थापा कार्यसमिति सदस्य पदमा निर्वाचित भएका थिए । सदस्य पदमा रहेर थापाले संस्थाको बृहत्तर हितका लागि विभिन्न कार्यक्रममा नेतृत्वदायी भूमिका निर्वाह गरेका कारण उनलाई सचिव पदमा सर्वसम्मतीले मनोनयन गरिएको अध्यक्ष सापकोटाले जानकारी दिए । सोही सभाले संगीतकार योगेन्द्र उपाध्याय निरौलालाई सदस्य पदमा मनोनयन गरेको छ ।
काठमाडौं : ‘१२औं अन्तर्राष्ट्रिय लोक सांस्कृतिक मेला २०८०’ आयोजना हुने भएको छ । आयोजक एभरेष्ट नेपाल कल्चरल ग्रुपले बिहीबार राजधानीमा एक पत्रकार भेटघाट कार्यक्रम गर्दै मेलाको विभिन्न पक्षबारे जानकारी दिएको हो ।
फागुन १८ गतेदेखि २७ गतेसम्म चल्ने मेला काठमाडौं, दाङ, पोखरा र ललितपुरमा आयोजना हुने आयोजक संस्था एभरेष्ट नेपाल कल्चरल ग्रुपका अध्यक्ष आरसी कोइरालाले बताए ।
‘ऐतिहासिक तथा विश्व सम्पदा सूचीमा आवद्ध पाटन दरबार र हनुमानढोका दरबार जस्ता क्षेत्रमा यस्ता कार्यक्रम आयोजना गर्नाले हाम्रो ऐतिहासिक धरोहरहरुको संरक्षण र सम्वर्द्धनमा प्रत्यक्ष तथा अप्रत्यक्ष टेवा पुग्ने विश्वास लिएका छौं,’ कोइरालाले भने, ‘यसबाट देशको विविध सांस्कृतिक, पुरातत्विक र अन्य पर्यटकीय स्थलको मात्र नभइ नेपालकै विश्वसामु प्रचार–प्रसार हुने आशा छ ।’
मेलामा अष्ट्रिया, बेल्जियम, बोस्टवाना, इस्टोनिया, जर्मनी, भारत, इन्डोनेशिया, मलेसिया, पोल्याण्ड, साउथ अफ्रिका र नेपालसहित विभिन्न राष्ट्रका विभिन्न सांस्कृतिक समूहका ३५० भन्दा बढी कलाकारहरुले भाग लिनेछन् ।
नेपाल जस्तो बहुजातीय र बहुभाषिक मुलुकमा प्रत्येक जातिका आ–आफ्नै भाषा र संस्कृतिहरु रहँदै आएको बताउँदै ग्रुपले नेपाली संस्कृतिप्रति स्वदेशी भन्दा विदेशी बढी आकर्षित हुनु पर्यटन प्रवद्र्धनका दृष्टिकोणले राम्रै मान्न सकिने बताएको छ । आफ्नो पहिचान र मौलिकता बोकेका संस्कृतिप्रति स्वयं नेपाली उदासिन हुनु दुःख लाग्दो पक्ष भएको र आफ्नो मौलिकतालाई बिर्सिएर पाश्चात्य संस्कृतिमा रमाउन थालेको युवा पिढीलाई पनि यसतर्फ आकर्षित गर्न यस्तो मेला महत्वपूर्ण हुने आयोजकको भनाइ छ ।
मेला २०५८ देखि प्रत्येका २ वर्षमा नियमित आयोजना हुँदै आएको छ । शुरुवातदेखि एघारौं संस्करणसम्म मेलामा करिब ८५ भन्दा बढी देशका ८ हजार ५ सय भन्दा बढी कलाकारहरुले घर आँगनमा आ–आफनो देशको मौलिकता झल्कने झाँकीसहित विविध लोकसांस्कृतिक कार्यक्रम प्रस्तुत गरिसकेको आयोजकको दाबी छ ।
नेपाली संस्कृति उत्थान तथा सांस्कृतिक प्रर्यटन प्रवद्र्धनको आफनो अभियानलाई निरन्तता दिँदै लोक संस्कृति आदान–प्रदान गर्नुका साथै नेपालमा सांस्कृतिक पर्यटन प्रवर्द्धन गर्नु यस मेलाको प्रमुख उद्देश्य रहेको आयोजकले बताएको छ ।
‘यस पटकको महोत्सव अवधिभर कलाकारहरुले आ–आफ्नो संस्कृति झल्कने भेष–भुषा लगाइ सांस्कृतिक झाँकी गर्ने र आफ्नो लोकगीत, संगीत र लोक नृत्य प्रस्तुत गर्नेछन्’, आयोजक संस्थाका अध्यक्ष कोइरालाले भने, ‘काठमाडौं आसपासका विद्यालयमा गइ विदेशी कलाकारहरुले आफ्ना सांस्कृतिक प्रस्तुति दिने र विद्यालयका विद्यार्थीहरुले समेत सांस्कृतिक प्रस्तुति दिने कार्यक्रम रहेको छ ।’ यस किसिमको सांस्कृतिक आदान प्रदानले विद्यार्थीहरुमा आफ्नो लोक संस्कृतिप्रति अभिरुची बढ्ने विश्वास अध्यक्ष कोइरालाको छ । मेलाको उद्घाटन फागुन १९ गते शनिबार नेपाल प्रज्ञा प्रतिष्ठान कमलादीमा हुनेछ ।
काठमाडौं : प्रदीप भट्टराई लिखित तथा निर्देशित फिल्म ‘महाजात्रा’ को टिजर सार्वजनिक गरिएको छ । मंगलबार ओएसआर डिजिटलमार्फत फिल्मको टिजर सार्वजनिक गरिएको हो । एक मिनेट १२ सेकेण्डको टिजरले फिल्मको कथावस्तु र चरित्र चित्रणबारे प्रकाश पार्छ । फिल्म ‘महाजात्रा’ ‘जात्रा’को तेस्रो शृंखला हो ।
टिजरमा अभिनेता राजाराम पौडेलको पात्रले एक गाडी पैसा लुकाउन प्रस्ताव गरेपछि तीन पात्र (विपिन कार्की, रविन्द्र सिंह बानियाँ र रविन्द्र झा)ले गर्ने संघर्ष र व्यहोर्नुपर्ने हैरानीलाई देखाइएको छ । टिजरमा अभिनेता हरिवंश आचार्य नेताको शैलीमा चित्रित छन् । ‘जात्रा’ र ‘जात्रै जात्रा’ पैसा र सुनमा केन्द्रित भएर बनेका थिए । ‘महाजात्रा’ भने सत्ता र पैसामा आधारित रहेको टिजरले प्रष्ट पारेको छ ।
फिल्ममा हरिवंश आचार्य, विपीन कार्की, रवीन्द्रसिंह बानियाँ, रविन्द्र झा, वर्षा राउत, दिव्य देव, गौमाया गुरुङ, शिशिर वाङदेल, प्रकार घिमिरे, प्रविन खतिवडा, अर्जुनजंग शाही, अरविन खड्कालगायत कलाकारको अभिनय छ ।
षट्कोण आर्टस ब्यानरमा निर्माण भएको फिल्ममा म्याक्स दीपेश खत्री र यज्ञश्वर पौडेल निर्माता छन् । फिल्मका कार्यकारी निर्माता रवीन्द्रसिंह बानियाँ हुन् । पुरुषोत्तम प्रधानले छायाँकन गरेको फिल्मलाई मित्रदेव गुरुङले सम्पादन गरेका हुन् ।
आगामी चैत ९ गतेदेखि प्रदर्शन हुन लागेको फिल्ममा प्रेम, मित्रता, परिवार र राष्ट्रियताको विषयलाई उठाएको निर्देशक भट्टराईले बताएका छन् ।
तिलु शर्मा पौडेल/मध्यान्ह
दोहा, कतार : ‘राई ईज किङ’ अर्थात राजेश पायल राईले खोटाङ जिल्लाको अति न्यून वर्गको परिवारमा जन्मेको मान्छे काठमाडौं आउनु, गीत संगीतमा प्रवेश गर्नु फलामे गेट जस्तो गाह्रो रहेको स्मरण गर्दै विगत ३५ वर्षदेखि नेपाली गीत संगीतमा दर्शकको मायाले टिकेको बताएका छन् । नेपाल तामाङ घेदुङ प्रवास कार्यसमिति कतारले आयोजना गरेको कलाकार सम्मान कार्यक्रममा उनले दर्शकहरूको आशीर्वाद नै आफ्नो सम्पत्ति रहेको, दर्शकको साथले आफू नेपाली गीत संगीतमा बिकिरहेको र आफू मारेर जाँदा पनि माया लिएर जाने बताएका हुन् ।
आफ्नो बिचार राख्ने क्रममा राईले ‘पहिचान कहिल्यै दोस्रो नहुने’ बताए । उनले आफू किराती भए पनि तामाङको कार्यक्रममा आउन पाउँदा खुसी लागेको बताए । शुक्रबारको ‘ल्होछार कन्सर्ट– २०२४’ आफ्नो पपुलारीटिले नभइ घेदुङको मेहनत र दर्शकको मायाले सफल भएको उनको भनाइ थियो । राईले आफूले सकारात्मक सोच राख्न सके जीवनमा धेरै सफलता हासिल गर्न सकिने विश्वास व्यक्त गरे । आफ्नो धर्म र संस्कृति, रीतिरिवाज जहाँ रहे पनि जोगाउन लाग्नुपर्ने र त्यसका लागि घेदुङ धन्यवादको पात्र बनेको उनले बताए ।
उक्त कार्यक्रममार्फत राईका अलावा तामाङ सेलो गायिका रेश्मा बोम्जन तामाङ, म्हेन्दोमाया तथा लोक दोहोरी गायिका मनमाया वाइबा र गायक उमङ्ग लामा सम्मानित भएका थिए । मायाको चिनोसहित सम्मान गरिएको कार्यक्रममा कलाकारलाई पारिश्रमिक पनि बन्द खाममा उपलब्ध गराइएको थियो ।
सम्मान ग्रहणपछि बोल्दै गायक तामाङले कार्यक्रममा निमन्त्रणा गरेर कतारसम्म ल्याउन सहयोग गर्ने घेदुङलाई धन्यवाद प्रकट गरे भने म्हेन्दोमाया गायिका वाइबाले गत सालको कार्यक्रममा आउन नसके पनि यो पटकको प्रयास सफल भएको भन्दै घेदुङ कतारले दिएको माया, सम्मान, सद्भाव सदैव मनमा राखिरहने बताइन् । दोस्रो पटक कतार आएकी मनमायाले पनि आयोजकलाई धन्यवाद ज्ञापन गरिन् ।
ल्होछार कार्यक्रमका लागि संगीतको दुनियाको बादशाहलगायत अन्य कलाकारहरूले संस्थागत निम्तोलाई सहर्ष स्वीकार गर्दै कतारसम्म आएर कार्यक्रमलाई भव्यताका साथ सम्पन्न गर्न विशेष साथ दिने कलाकारसहित कतारमा स्थापित विभिन्न संघ–संस्था, समाजसेवी, बुद्धिजीवी, पत्रकार, स्थानीय कलाकारलाई घेदुङ कतार कार्यसमितिका अध्यक्ष विकास स्याङ्तानले धन्यवाद ज्ञापन गरेका थिए ।
काठमाडौं : लोकप्रिय गायक स्वरुपराज आचार्यको नयाँ गीत 'सताएर जाउ' सार्वजनिक भएको छ । अविदित फाउन्डेसनको प्रस्तुति रहेको गीतमा लोकप्रिय मोडल अनुपजंग थापा बिचित्र र ऋचा थापाको अभिनय रहेको छ । डिआर अटुको संगीत, राज थेगीम आसरुतको शब्द, राजु कार्कीको एरेन्ज रहेको गीतलाई ओम प्रकाश अगस्तीले भिडियो निर्देशन र सम्पादन गरेका छन् ।
लामो समय विदेशमा बसेर नेपाली गीत संगीतमा केही गर्ने उद्देश्यका साथ नेपाल आएका अनुपजंग थापाले अविदित फाउन्डेसन नामक संस्था सञ्चालनमा ल्याएका छन् । नायिका बेनिसा हमाल अध्यक्ष रहेको उक्त संस्थामार्फत नेपाली कला, साहित्य, गीत संगीत र सामाजिक कार्यमा काम गर्ने उद्देश्य रहेको उनले बताए ।
निकै मर्मस्पर्शी गीत 'सताएर जाउ' हालसालै बजारमा आएको गीत हो । रक कौशलको क्यामेरामा रमणीयस्थानमा छायाँकन गरिएको गीतबाट आफू आशावादी रहेको मोडल अनुपजंग बताउँछन् । नायिका बेनिशा हमालसँग उनको 'सुनिदिने कोही भए' बोलको गीत केही समयअघि सार्वजनिक भएको थियो ।
तिलु शर्मा पौडेल/मध्यान्ह
दोहा, कतार : नेपाल तामाङ घेदुङ प्रवास कार्यसमिति कतारले शुक्रबार ल्होछार भव्यरूपमा मनाएको छ । नेपालीहरूको राष्ट्रिय पर्व, तामाङ जातिको नयाँ वर्ष मञ्जुश्री २८६० (डुक ल्हो/मु पुख्री वर्ष) अर्थात सोनाम ल्होछारका अवसरमा ‘ल्होछार कन्सर्ट २०२४’ आयोजना गर्दै मनाइएको हो । कन्सर्ट नेपालबाट कतारसम्म आएका र स्थानीय कलाकारहरूको सांगीतिक प्रस्तुतिसँगै सम्पन्न भएको हो ।
तामाङ जागरण गीत, झाँकी, नृत्यसहित उद्घाटन गरिएको कार्यक्रममा नेपालबाट आमन्त्रित कलाकारले उद्युम मच्चाएका थिए । सांस्कृतिक झाँकी, तामाङ सेलो, ताम्बा नाच, लामा नाच, म्हेन्दोमायालगायत विभिन्न नेपाली तथा तामाङ सांस्कृतिक प्रस्तुति रहेको कन्सर्टमा नेपालबाट आमन्त्रित गायक उमङ्ग लामाले केही नयाँ तथा पुराना गीतहरू सुनाए । लामाले काटदिउँला जुँगा जम्मै, हाम्रो जुगको पानी राम्रो, वारी जमुना पारी जमुनालगायतका आधा दर्जन गीत गाए । लगत्तै स्टेजमा चढेकी तामाङ सेलो गायिका रेश्मा बोम्जन तामाङले म्हेन्दोमायालगायतका आफ्ना केही हिट गीतहरू गाइन् ।
जापानको सांगीतिक कार्यक्रम सकेर शुक्रवार मात्र कतार आइपुगेकी चर्चित म्हेन्दोमाया तथा लोक दोहोरी गायिका मनमाया वाइबाले म्हेन्दोमाया गीतमा नचाइन् । उनले कतारमा दोहोरीमा आफूलाई जितेर यतै राख्न युवाहरूलाई ठट्यौली पारामा जिस्काउँदै नेपाली गीतहरू समेत गाइन् ।
घेदुङ प्रवास कार्यसमितिका अध्यक्ष विकास स्याङ्तानको सभापतित्व तथा कतारका लागि नेपाली सहायक राजदूत तथा मिसन उपप्रमुख कुमार राईको प्रमुख आतिथ्यता सम्पन्न कार्यक्रममा बोल्दै प्रमुख अतिथि राईले ऐतिहासिक कार्यक्रममा प्रत्यक्ष सहभागी भएर कार्यक्रमको अवलोकन गर्न पाउँदै खुसी लागेको बताए । उनले भव्य कार्यक्रम आयोजना गरेर सफलतापूर्वक सम्पन्न गरेकोमा घेदुङ प्रवास समिति धन्यवादको पात्र बनेको बताउँदै ल्होछारको शुभकामना दिए ।
कतारमा स्थापित विभिन्न संघ संस्थाका प्रमुख तथा प्रतिनिधिको आतिथ्यता रहेको कार्यक्रममा शुक्रबार अल अरबी स्पोर्ट्स क्लबको हलमा सम्पन्न भएको हो । सांगीतिक प्रस्तुति अन्तर्गत अन्तिम प्रस्तुति राजेश पायल राईको रहेको थियो । साँझको करिब सवा ६ बजे स्टेज चढेका राईले स्टेजबाट आइ लभ यु कतार भन्दा उनलाई हलको हुटिङ र मायाले भावुकसमेत बनायो । ‘जीवनमा धन सम्पत्ति, जग्गा जमिन जति जोडे पनि छोडेर जाने हो, तर यो माया आफैंले लगेर जाने हो,’ उनले भने ।
राईले दर्शकले दिएको माया र साथ नै आफ्नो साथमा लिएर जान सकिने हुँदा माया नै बाँड्नु र बढाउनु राम्रो हो भन्दै सिमल छाँयाले बोलको गीतमार्फत प्रस्तुति राख्न शुरु गरेका थिए । राईले दर्शन नमस्ते, तिमी सँगै जिउने मर्ने चाहना, म त मर्छु कि क्या हो ठूली, बसमा छैन यो मनलगायत एक दर्जन गीत गाए । राईलाई दर्शकले वान्स मोर गरी नै रहे ।
कार्यक्रम संयोजक एक्का प्रसाद तामाङले कार्यक्रमको बारेमा जानकारी दिँदै उपस्थित सबैलाई स्वागत गरेका थिए । कार्यक्रमका प्रमुख अतिथि, विशिष्ट अतिथिहरूलाई तामाङहरूको पोसाक (तागी) टोपी लगाइ सम्मान गरिएको थियो ।
महासचिव भीम राज स्याङबो तामाङ र उपमहासचिव कमला दोङ तामाङले मिलेर सहजीकरण गरेको कार्यक्रमको समापन गर्दै सभापति लामाले कार्यक्रमको व्यवस्थापन, सुरक्षा तथा स्वयंसेवकका रूपमा खट्ने, सहयोगी, प्रायोजक र उपस्थित सम्पूर्णलाई कार्यक्रम सफलताको श्रेय दिएका थिए ।
लोभलाग्दो कार्यक्रम र व्यवस्थापन
अल अरबी स्पोर्ट्स क्लबको हलमा घेदुङ प्रवास कार्यसमितिलाई साँझ ७ बजेभित्र कार्यक्रमको समापन गर्न दबाब थियो । कतार सरकारबाट अनुमति लिएर आयोजना गरिएको कार्यक्रमको भव्य हललाई तामाङहरूले आफ्नो संस्कार अनुसार धज्र्युले शुद्धीकरण गरेका थिए ।
कार्यक्रममा आमन्त्रित अतिथिसहित प्रत्येक व्यक्तिलाई प्रवेशद्वारमा नै खादा लगाएर स्वागत गरिएको थियो । हलको पोडियमबाहेक ग्राउन्डमा राखिएका सयौं कुर्सी अतिथि र दर्शकले भरीभराउ भएको थियो । करिब २ हजार जना उपस्थित रहेको कार्यक्रममा खाना पानीको समेत व्यवस्था चुस्तरूपमा गरिएको थियो ।
निकै व्यवस्थितरुपमा लोभ लाग्दो उपस्थितिबीच घेदुङ प्रवास कार्यसमितिले सोनाम ल्होछार भव्यरुपमा मनाएको हो । प्रत्येक वर्ष माघ शुक्ल प्रतिपदाका दिन मनाइने ल्होछार मुसा, गाई, बाघ, खरायो (बिरालो), ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा विभाजन गरी मनाउने गरिन्छ । ल्होछारका १२ वटै वर्ष पशु पन्छीको नामबाट गणना गरिएकाले यस समुदायलाई प्रकृति पूजक मानिन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies